Астанада Ә.Мәмбетов атындағы драма және комедия театры қалай дамып жатыр

Астанада 2018 жылдың қараша айында жаңадан Ә.Мәмбетов атындағы мемлекеттік драма және комедия театры ашылды. Бес жылға жуық ішінде қандай жетістіктерге жетті және алдағы уақытта жоспарлары туралы оның басшысы Александр Майер елорданың коммуникациялар қызметінде өткен брифингте айтып берді, деп хабарлайды қала әкімдігінің ресми сайты.

Бес жыл ішінде театр үлкен көрсеткіштерге қол жеткізді. Театр спектакльдері көрермен тарапынан үлкен сұранысқа ие болды.

Оған әрбір қойылымда залдың лық толып отыруы дәлел. Ұжым бірнеше рет республикалық және халықаралық театр фестивальдеріне қатысты, оның ішінде «Театралл» және «МартКонтакт» ба. Олардың көпшілігінде лауреат атанды.

Сондай-ақ, театр Қазақстан бойынша бірнеше гастрольдік сапар жасады.

«Театр репертуарында түрлі жанрдағы көрермендердің жүрегінен орын табатын, адамгершілікке, ынтымақтастыққа баулитын, адам жанын рухани байытатын, қызықты және әсерлі 22 спектакль бар. Қазіргі уақытта театрымызда жастардың 70% жұмыс істейді. Театрда Қазақстан Республикасының еңбек сіңірген 3 қайраткері: Қабатов Тұрсынбек Аманғалиұлы, Есендосов Ербол Мағзомұлы, Нартай Сауданбекұлы, сондай-ақ «Мәдениет саласының үздігі» төсбелгісінің 7 иегері қызмет етеді», - деді театр басшысы.

Мекеменің жақын арадағы жоспарлары – репертуарды жаңартудың 2023-2024 жылдарға арналған шығармашылық жоспарын құру, оған Қазақстанның және әлемнің үздік режиссерлерін, оның ішінде оқу кезінде немесе қойылымда өзін жақсы жағынан көрсеткен жастарды режиссер ретінде тарту көзделеді. Сондай-ақ репертуардағы қазақ және шетел драматургиясының қалыптасқан арақатынасын (тиісінше 70% және 30%) сақтауды қамтамасыз ету, жаңа туындылар жасау немесе бұрыннан бар шығармаларды енгізу мақсатында қазіргі қазақ драматургтерімен жұмысты жандандыру жоспарланып отыр.