«Еңбек жолы»: Астанада байқау жеңімпаздары марапатталды

Астанада «Еңбек жолы» байқауының өңірлік кезеңінің жеңімпаздары марапатталды, деп хабарлайды елорда әкімдігінің ресми сайты.

2013 жылдан бастап жыл сайын қыркүйектің соңғы жексенбісінде Қазақстанда Еңбек күні атап өтіледі. Мерекенің басты идеясы мен мақсаты – жұмысшы мамандықтарын насихаттау, еңбек әулеттеріне құрмет көрсету және еңбек адамының беделін арттыру. Президент Қасым-Жомарт Тоқаев Қазақстан халқына Жолдауында жастарды қажымас еңбекке баулу қажеттігін атап өтті: «Біз қоғамдық санаға еңбек идеалдары мен құндылықтарын сіңіруіміз керек».

«Егер 25 жыл бұрын елордада жұмыс күші 170 мың адамды құраса, бүгінде бұл көрсеткіш 4 еседен астам өсіп, 700 мыңға жуық адамды немесе жалпы халықтың 71 пайызын құрап отыр. Қала тұрғындары осы үрдісті толықтай қолдап, бүгінгі бәсекелестерімізден үлгі алса, біз қоғамның әл-ауқатын арттыру жолындағы барлық мақсаттарға жетеміз», - деді Астана қаласы әкімінің орынбасары Есет Бәйкен.

Биылғы байқауда бірінші орынды теміржол саласында 800 жылға жуық еңбек етіп келе жатқан Амангелдиновтер әулеті иеленді.

«Мен әулетіміздің төртінші буынымын. Оның негізін салушы Орыспек Амангелдинов Түрксібтің құрылысшысы болды. Ол өз карьерасын 1919 жылы бастады. Менің ойымша, біз сабақтастық пен үлкен тәжірибенің арқасында жеңіске жеттік. Бұл ретте әулетіміздің мүшесі толықтай теміржол саласын дамытуға қосқан үлесі үшін бір мезетте марапатталды», - дейді «ҚТЖ» ҰК» АҚ адам ресурстарын басқару департаментінің менеджері Лейла Амангелдинова.

Байқау 3 номинациядан тұрады: «Үздік еңбек әулеті» – ең ұзақ еңбек өтілі бар және ең көп марапаттары бар үлкен әулет таңдалады; «Үздік жас өндіріс қызметкері» – жұмыс өтілі 5 жылдан аспайтын ең белсенді және еңбекқор өндіріс қызметкері жеңімпаз болып танылады; «Жұмыс істейтін жастарға арналған үздік тәлімгер» – 20 жылдан кем емес жұмыс өтілі бар ең білікті тәлімгер.

Биыл қалалық кезеңге қатысуға 80 өтінім қабылданды.

Байқау қорытындысы бойынша «Үздік еңбек әулеті» номинациясында бірінші орынды «ҚТЖ» ҰК» АҚ Амангелдиновтер әулеті иеленді.

«Үздік жас өндіріс қызметкері» болып «Астана-АЭК» АҚ II санатты инженері Айнұр Байбатырова танылды.

«Еңбекші жастардың үздік тәлімгері» аталымы бойынша Астана қаласы әкімдігінің №38 мектеп-лицейі жанындағы мемлекеттік білім беру мекемесінің тарих пәнінің мұғалімі Гүлзия Иманбаева жеңімпаз атанды.

Жеңімпаздар 1 миллион теңгенің сертификатына және «Еңбек жолы» республикалық кезеңінде елорданың атынан қатысу мүмкіндігіне ие болды.