Елордалық оқушы шахматтан әлемнің төрт дүркін чемпионын жеңді

Астана қаласы әкімдігінің А. Сейдімбек атындағы №54 мектеп-лицейінің 11-сынып оқушысы Меруерт Камалиденова Қазақстан әйелдер құрамасы мен әлем құрамасы арасындағы матчта әлемнің төрт дүркін чемпионы, қытайлық Хоу Ифаньды жеңді, деп хабарлайды елорда әкімдігінің ресми сайты.

Меруер Камалиденова – шахматтан әйелдер арасында Қазақстанның екі дүркін чемпионы, қыздар арасында бірнеше рет ел чемпионатының жеңімпазы, 20 жасқа дейінгі қыздар арасында өткен әлем чемпионатының қола жүлдегері және жасөспірім қыздар арасында шахматтан әлем чемпионы, әйелдер арасында халықаралық шахмат шебері.

Ол шахматпен 6 жасынан бастап айналысып келеді. Ең алғашқы ойынын әкесімен ойнап бастаған Меруерттің ынтасы уақыт өте келе арта түскен. Осыны байқаған ата-анасы Меруертті шахмат үйірмесіне береді.

Жерлесіміз 6 жасынан бастап шахматтан қалалық, республикалық және халықаралық жарыстарға қатысып, жеңімпаз атанды.

Шахматтан тыс жекпе-жек өнері, қоян-қолтық ұрысы және дзюдомен айналысады.

Сыныптастарының айтуынша Меруерт өте сабырлы, биязы және жан-жақты оқушы.

Үлкен дайындықты қажет ететін спорттың бұл түрімен қатар Меруерт сабағын да үздік оқитын, «Алтын белгіге» үміткер оқушы.