Елордада мектеп тауарларына арналған жәрмеңке 28 тамызға дейін жалғасады

«Demalys Promenade» аумағында мектеп тауарларының жәрмеңке өтеді. Кеңсе тауарларын, киім-кешек, аяқ киім және керек-жарақтарды нарық құнынан төмен бағамен жергілікті кәсіпкерлер, сондай-ақ қазақстандық тігін және аяқ киім фабрикалары ұсынады, деп хабарлайды Нұр-Сұлтан әкімдігінің ресми сайты. 

Жәрмеңке 28 тамызға дейін жалғасады және 10:00-ден 19:00-ге дейін өтеді. 

«Жәрмеңке қала орталығында ұйымдастырылды. Күнделікті жұмысымызға байланысты базарға бару оңай емес. Мұнда бағалар айтарлықтай төмен. Балаларымызға қажетті заттар сатып алдық. Дәптері, қаламы, сөмкесі, қажеттінің бәрін табуға болады. Отбасылық бюджетімізге салмақ түспеді», - деді елорда тұрғыны Айжан Мұратова. 

«Жәрмеңкеге 18 кәсіпкер қатысып жатыр, олардың 6-ы – аяқ киім мен киім өндіреді. Сауда орындары тегін беріледі. Жалғыз шарт – кәсіпкер бағаны нарық бағасынан төмен белгілеуі тиіс. Сонымен қатар, балалар мен ата-аналарға арнап шығармашылық ұжымдардың ұйымдастыруымен күн сайын концерттік бағдарламалар қарастырылған», – деді іс-шараны ұйымдастырушылар.

Жәрмеңкеге кәсіпкерлерден басқа үкіметтік емес ұйымдар да жұмылдырылды. Мәселен, психологиялық сүйемелдеу қызметінің және "Құқық" ҚҚ мамандары заң, психологиялық және әлеуметтік мәселелер бойынша тегін консультациялар өткізеді. 

Айта кетейік, жәрмеңке "Мектепке жол" республикалық қайырымдылық акциясы аясында өтіп жатыр.