Елордада медицина қызметкерлері марапатталды

Конституция күні қарсаңында Нұр-Сұлтан қаласы әкімдігінің «№2 көпбейінді қалалық балалар ауруханасының» қызметкерлеріне Біріккен Ұлттар Ұйымының арнайы медалі табысталды, деп хабарлайды елорда әкімдігінің ресми сайты.

Нұр-Сұлтан қаласы әкімдігінің «№2 көпбейінді қалалық балалар ауруханасында» Конституция күніне арналған мерекелік іс-шара өтті. Шара барысында аурухана қызметкерлері денсаулық сақтауға қосқан үлесі үшін «AMANAT» партиясының алғыс хаттарымен марапатталды.

«Ата Заң – еліміздегі барлық құқықтық қатынастарды реттейтін маңызды құжат. Елімізде 5 маусым күні референдум өткізіліп, заңның 33 бабына көптеген маңызды процестерді реттейтін 60-қа жуық түзету енгізілді. Конституция күні қарсаңында біз медицина саласының қызметкерлерін құттықтап, олардың еңбегін ерекше атап өткіміз келді. Үздік қызметкерлер алғыс хаттармен марапатталды. Ақ халатты абзал жандардың жұмысы лайықты бағалануы керек деп есептеймін», - деді «AMANAT» партиясы қалалық филиалының мемлекеттік басқаруды дамыту және сыбайлас жемқорлыққа қарсы іс-қимыл жөніндегі Қоғамдық Кеңесінің төрағасы Владимир Савкин.

Сонымен қатар, «Мереке» қайырымдылық қорының қатысуымен «Мектепке жол» акциясы аясында аурухана қызметкерлерінің (дәрігерлер, медбикелер, санитарлар) оқушы балаларына арналған оқу құралдары бар сөмкелер тапсырылды. Олардың арасында көпбалалы отбасылар, жалғыз басты аналар, сондай-ақ мүмкіндігі шектеулі балаларды тәрбиелеп отырған жанұялар бар.

«Біз даярлық сыныптан 11-сыныпқа дейінгі оқушылар үшін жалпы саны 82 сөмке дайындадық. Бұл іс-шара «Мектепке жол» акциясы аясында ұйымдастырылады, акция жылына бір рет өткізіледі, қазір сөмкелерді екінші жыл табыстап отырмыз. Қазіргі уақытта қазақстандық отбасыларға дағдарыс салдарынан оңай болып жатқан жоқ, сондықтан акцияның маңызы жоғары. Біздің қор осылайша олардың қажеттіліктерін өтеп, көмек береді», - деді «Мереке» қоғамдық қорының жетекшісі Арман Қайрат.

Өз кезегінде, №2 КҚБА директоры Гүлнар Құлышева «AMANAT» партиясы мен «Мереке» қайырымдылық қорына іс-шараға қатысқаны және медицина қызметкерлерінің еңбегін жоғары бағалағаны үшін алғысын білдірді.