Елорда тұрғындарының саны 24 жыл ішінде төрт есеге жуық өсті

Ел астанасы ауысқан сәттен бастап 24 жыл ішінде қала тұрғындарының саны (1998 жылғы) 326 мыңнан (2022 жылы) 1 миллион 262 мыңға дейін төрт есеге жуық өсті, деп хабарлайды Нұр-Сұлтан әкімдігінің ресми сайты Ұлттық статистика бюросына сілтеме жасап.

Нұр-Сұлтандағы әйелдер саны әдеттегідей басым. 1998 жылы қалада 174 мың әйел адам мен 152 мың ер адам тұрса, қазір бұл сандар сәйкесінше 657 мың (52%) және 605 мың (48%).

24 жыл бұрын елордада 3400 бала дүниеге келді, 2021 жылы 31 мың бала дүниеге келді. Осылайша, бала туу коэффициенті 11-ден 25,9-ға дейін өсті (мың адамға шаққанда). Ел астанасы ауысқан жылы мұнда 48 жалпы білім беретін мектеп жұмыс істесе, қазір олардың саны 147-ге дейін өсті. Ал ауруханалар саны үш есеге артты: 15-тен 45-ке дейін.