Астанада денсаулық сақтау саласының ардагерлеріне арналған концерт өтті

Астананың Алматы ауданында Медицина қызметкерлері күні қарсаңында денсаулық сақтау саласының ардагерлеріне арналған мерекелік концерт ұйымдастырылды, деп хабарлайды қала әкімдігінің ресми сайты.

Іс-шара барысында өмірінің бірнеше онжылдығын қала тұрғындарының денсаулығын сақтауға арнаған, көптеген медициналық мекемелердің қалыптасуына үлес қосқан және жас мамандарды тәрбиелеген аға буын өкілдері құрметке бөленді.

Мерекелік бағдарламаны Алматы ауданының Ардагерлер кеңесі мен «Елорда» халық хоры дайындады. Қонақтарға Отан, достық және адамгершілік тақырыптарындағы танымал әндер ұсынылды.

Алматы ауданы Ардагерлер кеңесінің төрағасы Марат Мұстафин мұндай кездесулер дәстүрге айналғанын атап өтті.

«Медицина қызметкерлері күні – өз өмірін қоғамға қызмет етуге арнаған жандарға алғыс білдіретін маңызды мүмкіндік. Бүгінгі қонақтарымыз – елорда медицинасының дамуына зор үлес қосқан ардагерлер. Біз оларға мерекелік көңіл күй сыйлап, жылы ықылас көрсетуге тырыстық. Мұндай іс-шаралар ұрпақтар сабақтастығын нығайтып, еңбектің бағаланатынын көрсетеді», – деді ол.

Қалалық емхананың бас дәрігері Динара Байсеркина да аға буын тәжірибесінің қазіргі медицина үшін аса құнды екенін айтты.

«Елорда медицинасының әрбір жетістігінің артында өз ісіне адал еңбек еткен жандар тұр. Бүгінгі ардагерлер – кәсібилік пен жауапкершіліктің үлгісі. Олардың өмір жолы жас мамандар үшін нағыз тәжірибе мектебі», – деді ол.