Астанадағы Белсенді ұзақ өмір сүру орталығына күн сайын үш мыңнан астам қария барады
Астаналық мәслихат депутаты Алтыншаш Табулдинаның Сарыарқа ауданы зейнеткерлерімен есептік кездесуі барысында елордадағы Белсенді ұзақ өмір сүру орталығының жұмысы және аға буын өкілдеріне көрсетілетін әлеуметтік қолдауды дамыту мәселелері талқыланды, деп хабарлайды елорда әкімдігінің ресми сайты.
Іс-шара ашық диалог форматында өтіп, тұрғындар өздерін толғандырған сұрақтарын қойып, жан-жақты жауап алды.
Бүгінде Белсенді ұзақ өмір сүру орталығы елорданың мыңдаған тұрғынының басын қосып, Астананың әлеуметтік саясатының маңызды бағыттарының біріне айналған. Орталықтың филиалдары қаланың барлық алты ауданында жұмыс істейді, бұл қызметтерді егде жастағы адамдардың тұрғылықты жеріне жақын жерде алуына мүмкіндік береді.
Филиалдардың жалпы ауданы бүгінде алты мың шаршы метрден асады. Тек Есіл ауданында орталықтың қызметін бес мыңнан астам адам пайдаланса, Сарыарқа ауданында – шамамен төрт мың, Байқоңыр ауданында да осыған жуық адам қамтылған. Депутаттың айтуынша, бұл мұндай алаңдарға сұраныстың жоғары екенін көрсетеді.
«Көпшілік үшін бұл – қолдау табу, қарым-қатынас орнату, жаңа достар табу және белсенді қоғамдық өмірдің бір бөлігі болу мүмкіндігі. Белсенді ұзақ өмір сүру орталығы 2021 жылы қоғам белсенділері мен ардагерлердің бастамасымен құрылған, кейін бұл жоба мәслихат депутаттарының қолдауына ие болды. Бүгінде орталық өз жұмысын дамытып келеді», – деді депутат.
Орталықтағы ең танымал бағыттардың қатарында сауықтыру гимнастикасы, скандинавиялық жүріс, йога, би және денсаулықты нығайту жаттығулары бар. Спикердің айтуынша, зейнеткерлердің мұндай сабақтарға қызығушылығы олардың белсенді өмір салтын ұстануға және денсаулығын сақтауға ұмтылысын көрсетеді.
Қазіргі таңда Белсенді ұзақ өмір сүру орталығы қаладағы әлеуметтік инфрақұрылымның маңызды бөлігіне айналған: 2022-2026 жылдар аралығында оның қызметін шамамен 20 мың тұрғын пайдаланған, ал күн сайын филиалдарға үш мыңнан астам адам барады.
Кездесу барысында жобаның әлеуметтік маңызы да ерекше атап өтілді. Тұрақты сабақтар адамдардың физикалық жағдайын жақсартуға, мазасыздық деңгейін төмендетуге және жалғыздық сезімінің алдын алуға көмектеседі. Сонымен қатар орталықтың жұмысы медициналық мекемелерге түсетін жүктемені азайтып, жасына байланысты аурулардың алдын алуға және егде жастағы адамдардың өз бетінше өмір сүру қабілетін сақтауға ықпал етеді. Қатысушылардың айтуынша, мұндай жобалар тек әлеуметтік қана емес, экономикалық тұрғыдан да маңызды.
«Бүгінде сұранысқа ие бағыттардың бірі – IT-сауаттылықты үйрету. Зейнеткерлерге смартфондарды пайдалану, мемлекеттік қызметтер, мессенджерлер мен әлеуметтік желілерді қолдану үйретіледі. Цифрлық бейімделу – қазіргі қоғамдағы маңызды үрдіс және егде жастағы адамдарға өздерін сенімді сезінуге көмектеседі. Сонымен қатар орталықта әртүрлі қызығушылық клубтары белсенді дамуда. «Күміс еріктілер», интеллектуалдық ойындар, хор және вокал өнері, үстел теннисі, гаджеттер мен әлеуметтік желілерді қолдану сабақтары жүргізіледі», – деді мәслихат депутаты.
Кездесу соңында Алтыншаш Табулдина орталық қызметкерлері мен зейнеткерлерге қала өміріне белсенді қатысқаны үшін алғыс білдірді.
Сонымен қатар кездесуде қолдан жасалған бұйымдар мен фотосуреттер көрмесі ұйымдастырылып, орталықтың шығармашыл зейнеткерлері концерттік бағдарлама ұсынды.
Сауықтыру үйірмесінің қатысушылары да спорттық көрсетілім өткізді.