Астанада Жеңіс күніне орай «Момышұлы Бауыржан» концерт-спектаклі өтті

Астанадағы Бейбітшілік және келісім сарайында Халық қаһарманы Бауыржан Момышұлына арналған «Момышұлы Бауыржан» концерт-спектаклі өтті.

Қойылым театр өнерін, музыканы және архивтік материалдарды тоғыстырып, көрерменге майдангерлер ерлігі мен Жеңістің құнын тағы бір мәрте еске салды.

Елордадағы Бейбітшілік және келісім сарайы ғимаратында Жеңіс күніне орай «Момышұлы Бауыржан» атты концерт-спектакль өтті. Мәдени шараны Астана қаласы әкімдігінің Мәдениет басқармасы ұйымдастырды.

Қойылым Бауыржан Момышұлына арналды. Ол – Екінші дүниежүзілік соғыс жылдарындағы қазақ халқының ерлігі мен қайсарлығының символына айналған аты аңызға айналған қолбасшы әрі жазушы.

Концерт-спектакльге ардагерлер, әскери қызметкерлер, студенттер, зиялы қауым өкілдері мен қала тұрғындары қатысты.

Қойылымның негізіне тарихи деректер, архивтік бейнематериалдар мен соғыс жылдарындағы жарияланымдар арқау болды.

Театрландырылған көріністер арқылы көрермендерге Бауыржан Момышұлының майдан жолы, сарбаздарға деген қамқорлығы және Отанға адалдығы көрсетілді.

Спектакль жанды музыкалық сүйемелдеу, хореография және мультимедиялық шешімдермен толықтырылды. Сахнада соғыс жылдарының әндері, туған жер, майдандас достық пен тарихи жады туралы композициялар орындалды. Қойылым авторлары қарапайым сарбаздардың тағдыры мен майданға аттанған мыңдаған қазақстандықтың ерлігіне де ерекше назар аударды.

Басты рөлдерді Қуандық Қыстықбаев, Бақыт Қажыбек, Асылхан Төлепов және Данияр Оразаев сомдады. Сонымен қатар концерт-спектакльге Айгүл Қосанова, Жанғали Жүзбай, Бауыржан Исаев, Клара Төленбаева, Медет Салықов, Алтынай Жорабаева, Гүлсім Мырзабекова, Даурен Төлеубаев, Хамит Отарбаев, Нұрсат Алмас, Өзгеріс Шерікбай, Ұлттық әскери-патриоттық орталықтың «Жас сарбаз» балалар шығармашылық студиясының хоры және Art4man тобы қатысты.

Кеш соңында көрермендер өнерпаздарды ұзақ қол шапалақпен шығарып салып, бұл қойылым Жеңіс күніне арналған елордадағы тағылымды мәдени шаралардың біріне айналды.