Отан қорғаушылар күні: елордалық оқушыларға құтқарушылардың жұмысы таныстырылды

Отан қорғаушылар күні қарсаңында АӨБ-7 мамандандырылған өрт сөндіру бөлімі базасында елордалық №87 мектеп-гимназия оқушылары үшін ашық есік күні ұйымдастырылды, деп хабарлайды Астана әкімдігінің ресми сайты.

Кездесу барысында оқушылар құтқарушылардың жұмысымен тікелей танысып, олардың күнделікті қызметінің ерекшелігін көрді және мамандықтың маңызын тәжірибе жүзінде түсінді. Балаларға арнайы техника көрсетіліп, құтқару жұмысын іс жүзінде көрсету ұйымдастырылды.

«Біздің басты мақсатымыз – өрт сөндіру-құтқару техникасының мүмкіндіктерін ғана көрсету емес, сонымен қатар балаларға қауіпсіздік мәдениетінің негізін қалыптастыру. Мереке қарсаңында біз Отанды бейбіт уақытта қорғау – адамдардың өмірі үшін күнделікті күрес екенін өз мысалымыз арқылы көрсетеміз. Бұл кездесу кейбір оқушылардың болашақ мамандығын таңдауға ықпал етеді деп сенеміз», – деді Байқоңыр ауданы Төтенше жағдайлар басқармасының аға инженері, азаматтық қорғау аға лейтенанты Әділет Қабдрахманов.

Аудан әкімдігі өкілдерінің айтуынша, бұл жай ғана экскурсия емес, өскелең ұрпақтың жеке жауапкершілігін арттырып, елге қызмет етуге дайын болуға тәрбиелейтін тиімді формат.

Мұндай іс-шаралар жасөспірімдердің кәсіби бағдарын айқындауға және олардың азаматтық белсенділігін арттыруға ерекше ықпал етеді. Алдағы уақытта бұл форматты кеңейтіп, ауданның басқа да білім беру мекемелерін қамту жоспарланып отыр.