Астанада балалардың терезеден құлау қаупінің алдын алу күшейтілді: 1000-нан астам блокиратор орнатылып жатыр
Астана қаласының Төтенше жағдайлар департаменті елордалық полиция және еріктілермен бірлесіп, көпқабатты тұрғын үйлердегі балалардың терезеден құлауының алдын алуға бағытталған «Қауіпсіз терезе» профилактикалық акциясын өткізіп жатыр, деп хабарлайды қала әкімдігінің ресми сайты.
Акция аясында балалары бар отбасылар тұратын үйлерге арнайы терезе блокираторлары орнатылуда. Бұл жұмыс тұрғын үйлерді тізім бойынша аралау барысында жүзеге асырылып жатыр.
Осы мақсатта шамамен мыңға жуық блокиратор сатып алынған. Олар терезенің ашылу бұрышын шектеп, баланың оны толық ашуына мүмкіндік бермейді.
Астана қаласы Төтенше жағдайлар департаментінің инженері, азаматтық қорғау аға лейтенанты Әли Арғынбаевтың айтуынша, күннің жылынуымен қауіп айтарлықтай артады.
«Жылы күндер басталғаннан кейін балалардың терезеден құлау оқиғалары күрт көбейеді. Бүгін біз осындай жағдайлардың алдын алуға бағытталған акция өткізіп жатырмыз», – деді ол.
Акция аясында қаланың аудандарына бөлінген мобильді топтар құрылған. Мұндай тәсіл қысқа уақыт ішінде барынша көп үйді қамтуға мүмкіндік береді.
«Қазіргі таңда бізде қала бойынша орнатылатын мыңға жуық блокиратор бар. Алайда бұл жұмыс мұнымен тоқтамайды, қамту ауқымын кеңейтуді жалғастырамыз. Өткен жылы да осындай іс-шаралар өткізілген болатын және бұл жұмысты жергілікті атқарушы органдармен бірлесіп жалғастырамыз», – деп түсіндірді Әли Арғынбаев.
Мамандар ата-аналарға түсіндіру жұмысын да жүргізуде. Олар балаларды қысқа уақытқа болса да қараусыз қалдыруға болмайтынын ескертеді. Сондай-ақ москит торлары қорғаныс құралы болып саналмайды, өйткені олар салмақты көтере алмайды. Бұдан бөлек, терезе маңына жиһаз қоюға болмайды, себебі ол бала сол арқылы терезе алдына шығып кетуі мүмкін.
Акция аясында көмек алған тұрғындар оның практикалық маңызын атап өтуде. Олардың айтуынша, әсіресе бірнеше бала тәрбиелеп отырған отбасылар үшін блокиратор орнату өте маңызды.
Қала тұрғыны Жұпаргүл Сванованың айтуынша, олардың пәтерінде үлкен отбасы тұрады, сондықтан қауіпсіздік мәселесі аса өзекті.
«Біз – үлкен отбасымыз. Үйде бес немерем болады, кешке тағы балалар келеді. Бүгін бізге қорғаныс құрылғыларын орнатып берді, бұл біз үшін өте маңызды. Бұрын мұндай шаралар болмағандықтан, балалардың қауіпсіздігіне алаңдайтынбыз.
сындай көмек көрсеткендеріңіз үшін алғыс айтамыз», – деді астаналық тұрғын.