Астанада мейрамхана мен қонақүй бизнесінің өкілдері «Таза Қазақстан» аясында ағаш отырғызды
Астанада «Таза Қазақстан» экологиялық акциясы аясында №1 Индустриялық парк аумағында қонақүй және мейрамхана ұжымдарының қатысуымен ауқымды сенбілік өтті, деп хабарлайды қала әкімдігінің ресми сайты.
Астана қаласы Инвестициялар және кәсіпкерлікті дамыту басқармасы басшысының орынбасары Нұржан Әшімовтің айтуынша, сенбілікке мыңнан астам адам қатысты. Олардың қатарында өндірістік кәсіпорындар, қонақүйлер, мейрамханалар мен кофеханалар қызметкерлері бар. Қатысушылар 1000-нан астам көшет отырғызды.
Туризмді дамыту орталығы басқармасының төрағасы Артём Квашук бұл шараның тек экологиялық емес, біріктіруші маңызы да бар екенін атап өтті.
«Туризм саласынан 15 қонақүй, сондай-ақ мейрамханалар мен дәмханалар қатысып отыр. Біз қаланың туристік күн тәртібін қалыптастырамыз және мұндай акциялар сала қызметкерлерінің басын қосады деп есептейміз. Бұл – командалық жұмыс әрі өзара танысу алаңы. Қонақүйлер мен мейрамханалар бір-бірімен байланыс орнатады. Бұл — маңызды әрі қажетті іс. Біз игі іс жасап, ағаш отырғызып, жақсы көңіл күй сыйлаймыз», – деді ол.
Radisson Hotel Astana қонақүйінің бас инженерінің орынбасары Анатолий Мешков ұжымның мұндай бастамаларды үнемі қолдайтынын жеткізді.
«Осындай жалпықалалық шаралардан тыс қалу мүмкін емес. Бұл – қаланы көгалдандыруға үлес қосудың мүмкіндігі. Біз әрдайым қатысамыз. Бүгін компаниямыздан 27 адам келді», – деді ол.
Сондай-ақ ол кәсіпорынның экологиялық стандарттарды ұстанатынын атап өтті.
«Біздің компания «жасыл» кілтке ие болған, табиғатты қорғау бойынша халықаралық талаптарға сай келеміз, арнайы сертификатымыз бар. Сондықтан мұндай акцияларды толық қолдаймыз», – деді Мешков.
IBIS Astana қонақүйінің бас менеджері Валерий Егоркин бизнес пен қоғам арасындағы өзара іс-қимылдың маңыздылығына тоқталды.
«Кез келген қонақүй бос кеңістікте емес, қалада орналасқан. Сондықтан біз айналамызбен тығыз байланыста болуымыз керек. Әріптестермен, ұйымдармен және қорлармен тиімді әрекеттессек, бәріміз үшін нәтижелі болады», – деді ол.
Оның айтуынша, акцияға қатысудың символдық мәні бар.
«Қонақүйімізге 10 жыл толды, бүгін 10 адам келді. Келесі жылы 11 адам болады», – деді ол.
Good Project Family компаниясының тең құрылтайшысы Гурген Басенцян да акцияның ауқымына назар аударды.
«Бүгін қонақжайлылық индустриясынан 300-ден астам адам қатысты. Біздің компаниядан 21 адам келді», – деді ол.
Ол сондай-ақ соңғы жылдары елордадағы өзгерістерге тоқталды.
«Қала «жасыл» бастамалардың арқасында айтарлықтай өзгерді. Соңғы жылдары көгалдандыру Астананың келбетін айқын жақсартты. Бірнеше жылдан кейін келген қонақтар қаланың қаншалықты көркейгеніне таңғалады», – деді спикер.
Ұйымдастырушылар алаңның таңдалуы кездейсоқ емес екенін атап өтті. №1 Индустриялық парк ірі өндірістік кәсіпорындарды біріктіреді, ал олардың көгалдандыруға қатысуы қала экологиясына маңызды үлес қосады.
Айта кетейік, басты мақсат – «Таза Қазақстан» экологиялық акциясы аясындағы шаралар ауқымын кеңейтіп, бизнес, мемлекеттік құрылымдар мен қала тұрғындарын қоршаған ортаны таза әрі көгалдандыру жолында біріктіру.
#ТазаҚазақстан #экология #TazaChallenge #ТазаАула @TazaQazaqstan