«Astana Eurasian Book Fair – 2026»: халықаралық кітап көрме-жәрмеңкесіне 20 мыңға жуық адам қатысты

Астана отандық және шетелдік баспалар, жазушылар мен оқырмандар жиналып, рухани байланысты нығайтатын маңызды алаңға айналды. Елордада өтіп жатқан IX халықаралық «Astana Eurasian Book Fair – 2026» кітап көрме-жәрмеңкесіне екі күнде келушілер саны 20 мыңға жетті, деп хабарлайды елорда әкімдігінің ресми сайты.

«Кітап көрме-жәрмеңкесін ұйымдастыруды алғаш рет 2016 жылы қолға алған едік. Пандемияға байланысты 2020 жылы өтпей қалған болатын. Сонда биыл бұл іс-шара тоғызыншы рет өткізіліп жатыр. Жыл сайын кітап көрме-жәрмеңкесіне қатысушы елдер саны көбейіп келеді. Бұрын бір елден бір баспадан келсе, биыл бір елдің өзінен бірнеше баспадан келіп жатыр. Мысалы, Түркиядан 8 баспадан мыңға жуық кітап әкелініп отыр. Делегациясы сағат сайын іс-шараларын ұйымдастырып жатыр.

Жалпы, биылғы көрмеге Ресей, Португалия, Иран, Испания, Вэнесуела сияқты түрлі 15 елден келіп қатысып жатыр. Соның ішінде Ұлыбритания биыл алғаш рет қатысты. Жалпы, көрме Мәдениет және ақпарат министрлігі мен Астана қаласы әкімдігінің қолдауымен өтіп жатыр», – деді көрмені ұйымдастырушы, «Фолиант» баспасының бас редакторы Фарида Тобашалова.

Оның сөзінше, биылғы көрмеге 85 ұйым қатысуға өтінім берген. Оның ішінде 35-і – шетелдік ұйымдар.

«Түркі дүниесіне қатысты үш үлкен кітап көрмесі бар. Оның бірі, міне, Астанада өтіп жатыр. Біз осы көрмеге биыл алтыншы мәрте қатысып отырмыз. Мұнда кітаптарымызды сатумен қатар, қазақстандық баспалармен серіктестік құрайық деп те келдік. Осы уақытқа дейін «Фолиант» баспасымен бірлесіп, түрік тілінен қазақ тіліне аударылған 100-ге жуық кітап жарық көрді», – деді Түркияның «Дамла» баспа үйінің басшысы Мехмет Баһадүр.

Биылғы кітап көрме-жәрмеңкесі Ұлттық кітап күнімен тұспа-тұс келіп отырғандықтан, халықаралық іс-шара аясында Мәдениет және ақпарат министрлігі ұйымдастырған Ұлттық кітап байқауының қорытындысы осы алаңда өтті.

Сондай-ақ көрме аясында сиясы кеппеген ондаған жаңа кітаптың тұсаукесері өтіп, авторлармен кездесулер ұйымдастырылып жатыр.

Айта кетейік, 22 сәуір күні басталған «Astana Eurasian Book Fair – 2026» халықаралық кітап көрме-жәрмеңкесі 26 сәуірге дейін жалғасады.