Елордадағы зауыттың қуаты Қазақстанның машина жасау саласының жетекші өкілдеріне таныстырылды

Қазақстан машина жасаушыларының XIII форумы және «KAZAKHSTAN MACHINERY FAIR 2026» көрмесі аясында саланың жетекші өкілдері елордадағы «Локомотив құрастыру зауытына» барып, кәсіпорынның қызметімен танысты, деп хабарлайды Астана әкімдігінің ресми сайты.
Биыл «Локомотив құрастыру зауытының» (ЛҚЗ) іргетасы қаланғанына 20 жыл толып отыр. Осы уақыт ішінде зауыт 700-ден астам локомотив шығарып, теміржол машина жасау саласының флагманына айналды. Бүгінде олар барлық теміржол желісінде пайдаланылып келеді.

«Біз үшін бұл жыл ерекше мәнге ие. Қазіргі таңда ЛҚЗ – жылына 100-ге дейін техника шығара алатын заманауи өндіріс орны. Мұнда түрлі бағыттағы 700-ден астам маман еңбек етеді. Біз тек техника құрастырып қана қоймай, технологиялық мүмкіндіктерді кеңейтіп келеміз», – деді ТМД өңірі бойынша Wabtec компаниясының басқарушы директоры Қанат Алпысбаев.

Wabtec компаниясының Қазақстандағы алғашқы ірі жобаларының бірі 1996-2008 жылдар аралығында 2ТЭ10 сериялы тепловоздардың 410 секциясын жаңғырту болды.

Заманауи дизель-генераторлық қондырғылар мен басқару жүйелерін орнату нәтижесінде локомотивтердің қызмет ету мерзімі 15-20 жылға ұзартылып, отын шығыны 20%-ға қысқарды. Сонымен қатар олар ГОСТ және UIC II экологиялық стандарттарына толық сәйкес келеді.

2009 жылдан бастап Астанадағы «Локомотив құрастыру зауыты» базасында жаңа буын локомотивтері – жүк, жолаушылар және маневрлік ТЭ33А(С) Evolution, ТЭП33А және ТЭМ11 сериялары өндіріле бастады.

GEVO12 дизель қозғалтқыштарымен жабдықталған Evolution сериялы жүк локомотивтері бүгінде «Қазақстан темір жолы» ұлттық компаниясының тепловоз паркіндегі жүк тасымалының 92%-ын қамтамасыз етіп отыр.

Оларды пайдалану нәтижесінде жүк тасымалындағы отынның меншікті шығыны 26%-ға азайып, зиянды заттардың шығарындылары 30%-дан астамға қысқарды.

ЛҚЗ жүк локомотивтерін тек «Қазақстан темір жолы» үшін ғана емес, сонымен қатар Тәжікстан, Түрікменстан, Әзербайжан, Моңғолия, Қырғызстан, Өзбекстан және басқа да елдерге экспорттайды.

Форумның басты жаңалықтарының бірі – Wabtec корпорациясының Қазақстанда GEVO дизель-генераторлық қондырғыларын өндіруді бастау туралы шешімі болды. Бұл – АҚШ-тан тыс жерде жүзеге асырылатын осындай деңгейдегі алғашқы өндіріс. Дизель қозғалтқыштарын тікелей Астанада құрастыру жеткізу тізбегінің тұрақтылығын қамтамасыз етіп, елдің индустриялануына жаңа серпін береді.

Саланың дамуы үшін халықаралық ірі компаниялардың Қазақстандағы кооперациясы да маңызды. Компания электровоздарға арналған құрамдас бөліктерді өндіру бойынша Alstom-мен белсенді жұмыс істейді.
«Өткен жылдың соңында Alstom компаниясымен алты осьті жаңа электровоздарды құрастыру туралы жасалған келісім біздің бірлескен қазақстандық құзыреттерімізді айтарлықтай арттыруға мүмкіндік береді», – деп атап өтті Қанат Алпысбаев.

Ауыр машина жасаумен қатар, интеллектуалды жүйелерді енгізуге де ерекше назар аударылуда. Астанада жылжымалы құрамды автоматты диагностикалауға арналған машина оқыту (AI) технологиялары енгізілуде. Бұл цифрлық шешімдер техниканың жағдайын нақты уақыт режимінде бақылауға мүмкіндік беріп, тасымал қауіпсіздігі мен тиімділігін арттырады.

Wabtec сияқты серіктестердің арқасында Қазақстан технология импорттаушы елден өз инженерлік әлеуеті, экспорттық мүмкіндігі және заманауи цифрлық басқаруы бар өңірлік хабқа айналып келеді.