Кибергигиена, полицей дроны және цифрлық сауаттылық: Астанада Наурыз мейрамына орай «Заң мен тәртіп» киіз үйі ашылды

Астанада жалпыұлттық «Наурызнама» онкүндігі аясында құқықтық мәдениетті арттыруға, цифрлық сауаттылықты дамытуға және жастар мен қала тұрғындары арасында жауапкершілікті қалыптастыруға бағытталған «Заң мен тәртіп» іс-шаралар кешені өтті, деп хабарлайды елорда әкімдігінің ресми сайты.

Іс-шаралардың негізгі алаңы Халықаралық EXPO көрме орталығы аумағында орналасқан «Заң мен тәртіп» тақырыптық киіз үйі болды.

Мұнда күн сайын ағартушылық, интерактивті және әлеуметтік іс-шаралар ұйымдастырылуда. Бағдарлама құқық бұзушылықтың алдын алу, киберқауіпсіздік және салауатты өмір салтын насихаттау бағыттарын қамтиды.

Келушілер үшін QR форматында кибергигиена бойынша тестілеу ұйымдастырылып, оқыту материалдарына қолжетімділік берілген. Сондай-ақ киберқауіпсіздік және есірткіге қарсы іс-қимыл тақырыбында дәрістер өткізіліп, қазақ және орыс тілдерінде интерактивті викториналар (Kahoot) ұйымдастырылған. Қазіргі заманғы технологиялар – робот-ит пен полицей дроны көрсетілуде.

Сонымен қатар «Вейпті спорт құралына айырбаста» атты әлеуметтік акция және «Заң мен тәртіп» бағыты бойынша тестілеу жүргізіліп жатыр.

Жобаның мақсаты – құқықтық сананы қалыптастыру, халықтың цифрлық қауіпсіздік деңгейін арттыру, зиянды әдеттердің алдын алу және заңға бағыну мәдениетін нығайту.

Іс-шаралар ашық форматта өтіп, еріктілердің қатысуымен, LED-экрандардағы тақырыптық контентпен және ақпараттық материалдар таратумен сүйемелденуде.