«Заң мен тәртіп»: Астанада кекушин будокай каратэден турнир өтеді

Астанада «Заң мен тәртіп» қағидаты аясында, сондай-ақ есірткі қылмысына қарсы күрес шеңберінде 14 және 15 ақпан күндері жыл сайынғы дәстүрлі Astana OPEN VI кекушин будокай каратэ турнирі өтеді, деп хабарлайды қала әкімдігінің ресми сайты.

Турнир құқық бұзушылықтардың алдын алуға, жастар арасында тәртіптілік, жауапкершілік пен салауатты өмір салтын қалыптастыруға бағытталған «Астана – есірткісіз қала» әлеуметтік маңызы бар жобасы және «Заң мен тәртіп» қағидаты аясында ұйымдастырылады.

Жарысқа әртүрлі бағыттағы үздік спортшылар қатысады, ал іс-шара қаланың спорт күнтізбесіндегі маңызды оқиғалардың бірі болмақ.

Спортшылар Ката және Кумитэ бойынша шеберліктерін көрсетеді. 600-ден астам қатысушы татамиге шығуға ниет білдірген.
Биыл турнирге Қазақстанның 15 өңірінен өкілдер қатысады.

Жарысты Астана қаласының «Кекушин Будокай Каратэ федерациясы» қоғамдық бірлестігі, қалалық Полиция департаментінің Есірткі қылмысына қарсы іс-қимыл басқармасы, сондай-ақ елордалық Дене шынықтыру және спорт басқармасы ұйымдастырады.

Турнирдің ресми ашылуы 15 ақпан күні сағат 16:00-де Ахмет Байтұрсынұлы көшесі, 18 мекенжайында орналасқан Бекзат Саттарханов атындағы спорт кешенінде өтеді.