Астанада қар күреу жұмысына 2000-ға жуық техника шығарылды
Астананың коммуналдық қызметі қыс мезгілі басталғалы бері тоқтаусыз, тәулік бойғы режимде жұмыс істеп келеді. Қар күреу жұмысы күндіз де, түнде де жүріп жатыр, деп хабарлайды Астана қаласы әкімдігінің ресми сайты.
Өткен түнде қала аумағынан арнайы полигондарға 4 116 рейспен 70 мың текше метрге жуық қар шығарылды.
10 ақпан күні таңертеңнен бастап қар күреу жұмысына 3 101 жол жұмысшысы мен 2000-ға жуық арнайы техника жұмылдырылды.
Ең алдымен негізгі көшелер мен қоғамдық көлік жүретін бағыттар тазартылуда. Одан кейін қозғалыс қарқыны орташа аумақтарда – аулаларда, алаңдарда, тротуарлар мен аялдамаларда тазалау жұмысы жүргізіледі.
Жалпы, қыс мезгілі басталғалы бері қаладан қар полигондарына 309 043 рейспен 4,4 млн текше метрден аса қар шығарылған.
Қала тұрғындарының қауіпсіз қозғалысын қамтамасыз ету үшін жолдар, тротуарлар мен көшелерге техникалық тұз себілуде. Бұл жұмыстар да тәулік бойы атқарылып жатыр.
Сонымен қатар, аула аумақтарындағы тазалықты қамтамасыз ету пәтер иелері кооперативтері (ПИК) мен мүлік иелері бірлестіктерінің (МИБ) міндетінде. Олар тұрғындардың қауіпсіздігі мен қолайлылығы үшін аулаларды қар мен көктайғақтан уақытылы тазалауы тиіс.
Астана қаласының әкімдігі қала тұрғындары мен қонақтарын қауіпсіздік ережелерін сақтауға, жолдар мен тротуарларда барынша сақ болуға, сондай-ақ қолайсыз ауа райы жағдайында алыс жолға шықпауға шақырады.