Жаңа жыл қарсаңында елордада «Заң және тәртіп» қағидаты мен «Astana Жас Жігер» жобасы аясында NEET санатындағы жастар арасында шағын футболдан турнирдің финалдық кезеңі өтті, деп хабарлайды Астана қаласы әкімдігінің ресми сайты.
Турнирді елорда әкімдігіне қарасты «Астана жастары» жастар ресурстық орталығы ұйымдастырды.
«Заң және тәртіп»: Астанада NEET санатындағы жастар арасында шағын футбол турнирі өтті
Финалдық кезеңге 10-14 желтоқсан аралығында өткен іріктеу турларынан сүрінбей өткен үш команда қатысты. Турнир жастар арасында командалық рухты нығайтуға, өзін-өзі дамытуға деген ынтаны арттыруға және әлеуметтік байланыстарды кеңейтуге бағытталды.
«Астанада NEET санатындағы жастар, базар қызметкерлері мен жұмыссыз азаматтар арасында шағын футболдан жоба аясындағы шешуші кезең өтті. Турнир жастардың бос уақытын тиімді ұйымдастыру және оларды белсенді өмір салтына тарту бағдарламасы аясында өткізілді. Жартылай финалға үш команда шықты, ал финалда «ZIGIZAGI» және «Бүркіт» командалары кездесіп, турнирдің басты жүлдесін өзара сарапқа салды», – деді «Астана жастары» ЖРО КММ маманы Айсұлу Қайыр.
«Astana Жас Жігер» жобасы 2022 жылы бастау алды. Сол уақыттан бері жобаға қатысушылар туралы ақпарат «Астана жастары» орталығының дерекқорына енгізіліп келеді. Бұл жастармен алдағы уақытта жүйелі әрі мақсатты жұмыс жүргізуге мүмкіндік береді.
«Жыл сайын жобаның басталатыны туралы алдын ала хабарлаймыз: әлеуметтік желілерде хабарландырулар жариялаймыз, түрлі чаттарға ақпарат таратамыз. Бірі турнир туралы әлеуметтік желі арқылы білсе, енді бірі достарының ұсынысымен келеді. Осылайша командалар біртіндеп қалыптасады», – деп түсіндірді ол.
Жарыс қорытындысы бойынша жүлделі орын алған командалар кубоктармен, медальдармен, дипломдармен және бағалы сыйлықтармен марапатталды. Турнир жеңімпаздарына теледидар табысталды. Екінші орын иегерлері шаңсорғышқа ие болса, қола жүлдегерлерге сымсыз құлаққаптар берілді.
Жобаның басты мақсаты – тек спорттық жарыс өткізу емес, сонымен қатар жастар арасында профилактикалық жұмыс жүргізу.
«Біз жастарды белсенді өмір салтын ұстануға, спортпен айналысуға және бос уақытын пайдалы өткізуге ынталандырамыз. Бұл құқық бұзушылықтың, есірткі қылмыстары мен нашақорлықтың алдын алу тұрғысынан аса маңызды. Қазір қалада осы бағытта ауқымды жұмыс атқарылып жатыр, біз халықтың түрлі санатын, әсіресе жастарды қамтуға тырысамыз. Олар қателікке бой алдырмай, теріс жолға түспеуі керек», – деп атап өтті Айсұлу Қайыр.