Әлеуметтік медициналық сақтандыру қоры Астананың үздік емханаларын анықтады
Астанада ең үлгілі емханалар анықталды. «Әлеуметтік медициналық сақтандыру қоры» КЕАҚ-тың елордалық филиалы «Бастапқы медициналық-санитариялық көмектің көшбасшысы» атты жыл сайынғы байқаудың қорытындысын шығарып, үздік медициналық ұйымдарды марапаттады, деп хабарлайды қала әкімдігінің ресми сайты.
Байқауды «Әлеуметтік медициналық сақтандыру қоры» КЕАҚ-тың Астана қаласы бойынша филиалы ұйымдастырды. Іс-шара медициналық қызметтердің сапасын арттыруға және алғашқы медициналық-санитариялық көмек (БМСК) жүйесін дамытуға бағытталған.
«Төрт ай бойы Астанадағы алғашқы медициналық-санитариялық көмек көрсететін 42 ұйым бірқатар негізгі көрсеткіш бойынша өзара бәсекеге түсіп, кәсібилігін, жұмыс тиімділігін және пациенттерге қызмет көрсету сапасын жақсартуға ұмтылысын көрсетті. Медициналық ұйымдардың қызметі бес негізгі индикатор бойынша бағаланды.
Олардың қатарында міндетті әлеуметтік медициналық сақтандыру (МӘМС) жүйесінде БМСК ұйымдарына тіркелген сақтандырылмаған азаматтар санын азайту, бұқаралық ақпарат құралдары мен әлеуметтік желілерде МӘМС-тің артықшылықтары мен жұмыс істеу қағидаттары, сондай-ақ жарналар мен аударымдарды төлеу тәртібі бойынша ақпараттық-түсіндіру жұмысының белсенділігі, пациенттерді қолдау қызметі мен ішкі бақылау жұмысы туралы ақпараттық материалдар саны қамтылды. Сонымен қатар Қор филиалына БМСК субъектілеріне қатысты түскен шағымдар саны және диспансерлік есепте тұрған науқастардың тәулік бойы жұмыс істейтін стационарларға шұғыл түрде жатқызылу көрсеткіштері де ескерілді», – деді қордың елордалық филиалының директоры Гүлжан Шайхыбекова.
Кешенді бағалау нәтижесі бойынша бірінші орын Астана қалалық №4 емханаға, екінші орын «Шипагер» отбасылық денсаулық орталығы» ЖШС-ге, үшінші орын қалалық №7 емханаға берілді.
Жеңімпаздар мен жүлдегерлерге кубок пен алғыс хаттардан бөлек, Абай Құнанбайұлының 180 жылдығына орай ұлы ақынның шығармалар жинағы табысталды.
Халық арасында ақпараттық-түсіндіру жұмысына белсенді қатысқаны үшін Республикалық бастапқы медициналық-санитариялық көмек орталығы арнайы дипломмен марапатталды.
«Бұл байқау барлық қатысушы үшін үлкен ынталандыру болды. Ол БМСК ұйымдарының өзгерістерге дайын екенін, жетілдіруге ұмтылысын және пациенттер алдындағы жауапкершілігін айқын көрсетті.
Жеңімпаздар лайықты марапатқа ие болды, алайда біз әрбір қатысушыға алғыс білдіреміз, әрқайсысының қосқан үлесі еліміздің денсаулық сақтау жүйесін дамыту үшін маңызды», – деп атап өтті ұйымдастырушылар.