Астанада ЖРВИ мен тұмау жағдайы: дәрігерлер фильтр-кабинеттердің жұмысы мен пациенттерді емдеу барысын түсіндірді
Астанада ЖРВИ-мен және тұмаумен сырқаттанушылық деңгейі төмендеп келеді. Алайда маусым әлі аяқталған жоқ. Инфекцияның таралу қаупін азайту және тұрғындарға жедел көмек көрсету үшін қалалық емханаларда фильтр-кабинеттер жұмыс істейді, деп хабарлайды елорда әкімдігінің ресми сайты.
Елордалық дәрігерлер фильтр-кабинеттердің қалай жұмыс істейтінін айтып, ауруларды емдеуге қатысты кеңестер берді және тұрғындар жиі жіберетін қателерге назар аударды.
Елордадағы №13 қалалық емхананың шұғыл көмек бөлімінің фельдшері Дархан Құлмаханның айтуынша, қараша айындағы сырқаттанушылықтың шарықтау кезеңінде медициналық ұйым күніне 100-ге тарта пациент қабылдаған.
«Біздің емханада үш фильтр-кабинет жұмыс істейді. Біз балаларды қабылдаймыз, ал қарсы бетте ересектерге арналған кабинет орналасқан.
08:00-ден 20:00-ге дейін жұмыс істейміз. Баланы қарап, егер жоғары температура үш күн және одан көп болса, әлсіздік байқалса, сатурациясы төмен болса, госпитализацияға жолдама береміз. 5 жасқа дейінгі балаларды ата-анасымен бірге, 5 жастан кейін бөлек жатқызуға болады. Эпидмаусым басталғанға дейін алты күн жұмыс істесек, қазір жүктеме көп болғандықтан, жеті күн жұмыс істейміз. Мұндай кезеңде учаскелік дәрігерге жазылу қиын, ал бізде пациент кезексіз бірден көмек ала алады. Ем тағайындаймыз, еңбекке жарамсыздық парағын немесе анықтама бере аламыз. Тіркелген емханасы маңызды емес, адамның жағдайы нашар болса, бірден көмек көрсетеміз», – деді ол.
Координатор-дәрігер Наргиз Тоқсейітова ауру кезінде не істеуге болмайтынын еске салды.
Оның айтуынша, ата-аналар көбіне баласының ЖРВИ немесе тұмаумен ауырды деп ойлайды, алайда қазіргі кезде аденовирус, риновирус және басқа да инфекциялар да кең таралған.
«Диагноз және ем тағайындау тек дәрігердің тексеруінен кейін ғана мүмкін.
Тағы бір қате түсінік – жоғары температураны міндетті түрде түсіру. Егер 38,5°C кезінде бала белсенді, тамақ ішіп, су ішсе, қызуды түсірудің қажеті жоқ, ағза өзі күреседі. Бірақ 37,7°C кезінде бала әлсіз болса, онда температураны түсіру керек.
Сондай-ақ көптеген ата-ана балада тұмау белгілері байқалса, оны далаға шығармайды және мүлде жуындырмайды. Бұл дұрыс емес, таза ауа қажет, ал жуынуға қарсы көрсетілім жоқ. Мұрын бітелуі міндетті түрде емделуі тиіс: мұрынды шаю керек, әйтпесе отит қаупі артады», – деді дәрігер.
Жұқтыру қаупін төмендетуге таза ауада серуендеу, дұрыс тамақтану және витамин қабылдау көмектеседі.
«Тұмауға қарсы вакцинация өте маңызды, ол 6 айлық кезден бастап жүргізіледі. Омыраудағы балалар тәуекел тобында, себебі анатомо-физиологиялық ерекшеліктеріне байланысты оларда асқынулар тез дамиды. «Қызыл жалаушалар» бар: температура 38°C-тан жоғары, әлсіздік, нашар ему, тырыспалар. Мұндай кезде жедел жәрдем шақыру немесе қабылдау бөліміне бару қажет», – деді ол.
Дәрігер ата-аналардың ең ауыр қателерінің бірі – антибиотиктерді рұқсатсыз, өз бетімен беру екенін атап өтті. Үш күннен астам жоғары температураға алаңдап, көпшілігі антибиотик беруді бастайды, әрі көбіне дозасы дұрыс болмайды.
Мамандардың айтуынша, вирус жұқтырған кезде қызу 5-7 күнге дейін сақталуы мүмкін, бұл – қалыпты жағдай. Мұндай кезде антибиотик тек зиян келтіреді: төзімділік қалыптастырады және олар шынымен қажет болғанда әсер етпеуі мүмкін. Тағы бір жиі қателік – өз бетімен ингаляция жасау.
«Беродуал бронх обструкциясы кезінде қолданылады және оны қалаған кезде қолдануға болмайды. Ол тахикардия тудыруы, шырыш бөлінуін күшейтуі мүмкін, сонда баланың жағдайы нашарлайды. Баланы спиртпен ысқылауға, қой майымен майлауға болмайды. Егер температура жоғары болса, бірақ қол-аяғы жылы және қалтырама болса, жылы сумен (суық емес) ысқылауға болады. Ал аяқ-қолы мұздай болса, мұны жасауға болмайды, салдарынан тамыр спазмы мен тырыспалар болуы мүмкін», – деп түсіндірді Наргиз Тоқсейітова.
Қауіп тобына зейнеткерлер мен жүкті әйелдер де кіреді.
Жүкті әйелдердегі тұмау тәрізді аурулар қауіпті, себебі олар тез өршіп, асқынуларға әкелуі мүмкін.
Мұрынның бітелуі, тамақтың ауыруы, температураның көтерілуі сияқты алғашқы белгілер байқалғанда-ақ дәрігерге немесе әйел тіркелген емханаға бару қажет. Сондай-ақ фильтр-кабинеттерге жүгінуге болады.
Егер жағдай нашарласа, жедел жәрдем шақыру керек.
Жүкті әйелдерге өзін-өзі емдеуге қатаң тыйым салынады.