Астанада дербестендірілген медицина, нысаналы терапия және бірегей операцияларға арналған халықаралық ғылыми-практикалық конференция өтіп жатыр, деп хабарлайды елорда әкімдігінің ресми сайты.
«Дербестендірілген медицина: ісіктің молекулалық-генетикалық сипаттамаларынан терапияны таңдауға дейін» атты ғылыми-практикалық конференцияны Онкологтар мен радиологтар альянсы Мультипрофильді медициналық орталықпен бірлесіп ұйымдастырды.
Іс-шараға Қазақстан, АҚШ, Франция, Түркия, Қытай, Польша, Өзбекстан, Ресей, Аустрия және Ресей елдерінен келген 400-ден астам маман қатысып жатыр.
Конференция гибридті форматта өтіп, әлемнің түкпір-түкпіріндегі қатысушыларға онлайн қосылуға мүмкіндік береді.
Конференция дербестендірілген медицина саласындағы соңғы жетістіктерге, ерекше операцияларға, нысаналы терапия мен иммуноонкологияға арналған.
Дербестендірілген медицина – тек заманауи технологиялар ғана емес, орталық мамандарының күнделікті жұмыс философиясы. Бұл тәсіл ауруды дәл диагностикалауға, таргеттік препараттың «нысандарын» анықтауға, иммунотерапияның тиімділігін болжауға және пациент үшін тәуекелдерді азайтуға мүмкіндік береді.
Іс-шара барысында морфологтар, генетиктер, химиотерапевтер, онкохирургтер, онкоурологтар және сәулелік диагностика мамандары заманауи зертханалық және клиникалық әдістерді таныстырды. Конференция тәжірибе алмасу, инновациялық тәсілдерді талқылау және оларды клиникалық практикаға енгізу алаңына айналды. Бұл орталықтың патологиялық анатомия, молекулалық диагностика және иммуноонкологиялық платформаларды дамытуға деген ұмтылысын айғақтайды.
Конференция дәстүрлі тәсілдерден ісіктердің молекулалық талдауы, биоинформатика және әр пациентке жеке көзқарасқа негізделген түбегейлі жаңа медициналық модельге көшу үдерісін айқын көрсетеді. Бұл онкологиялық ауруларды емдеуде жаңа мүмкіндіктер ашады.