Астанада JOLTAP жобасы отставкадағы офицерге кәсібін нөлден бастауға көмектесті
Астанада жүзеге асырылып жатқан JOLTAP жобасы елордалықтарға жаңа кәсіп меңгеріп, таңдаған ісін дамытуға мүмкіндік беріп келеді. Бағдарлама түлектерінің бірі Жұлдыз Сейдахметова JOLTAP жобасындағы оқу оның тігін ісін дамытып, өз ательесін ашуға қалай мүмкіндік бергені туралы әңгімелеп берді, деп хабарлайды Астана әкімдігінің ресми сайты.
Жұлдыз Сейдахметова – отставкадағы офицер.
«Мен – отставкадағы офицермін. Зейнетке шығардан бұрын-ақ ақылы тігін курстарынан өткенмін, тігін тігуді білетінмін, тігін машинам да болды. Әжем шебер адам болатын, ол да өмірінде осы өнерді қолданған.
Шығармашылыққа, тігінге деген сүйіспеншілік маған генетикалық тұрғыда берілген сияқты. Тігін, тоқыма, қолөнер ісі мені мектеп кезінен қызықтырды. Себебі, әдемі де үйлесімді дүниені жасаудың сезімі ерекше», – дейді ол.
JOLTAP жобасы туралы ол 2024 жылы Кәсіби даму орталығында білген және бірден «Модельер-құрастырушы» мен «Бухгалтерлік есеп негіздері» курстарына жазылған.
«Модельер-құрастырушы» курсында оқытушы Анар Төлегенқызының жетекшілігімен Жұлдыз 10 өлшем бойынша кроиль әдістері мен модельдеуді меңгерген, бұл білімді қазір киім тігуде қолданып жүр.
«Бұл курс өте ерекше. Алған білімімнің арқасында «ЖұлдызАй» ательесін ашуға тәуекел еттім. Бухгалтерия курсы да пайдасын тигізді, қызметте жүрген кезімде есеппен айналысқанмын, қазір жеке кәсіпкер ретінде салық пен декларацияны өзім тапсырамын», – дейді түлек.
2025 жылы ол білімін жалғастырып, тағы бірнеше бағытты меңгерді. Жұлдыз Фарида Арыстанқызынан «Тігінші» курсын тәмамдағанын және оны кәсіби әрі жоғары деңгейлі ұстаз ретінде бағалайтынын айтады.
Сондай-ақ «Таргетолог» курсын оқып, «Kaspi-дүкендегі сатылым негіздері» курсын аяқтаған. Бұл оған интернет-дүкен ашып, өз бұйымдарын онлайн сатуға дайындалуына мүмкіндік берді.
«Таргет курсы – менің көптен бергі арманым. Жанболат бізге түсінікті бағдарлама мен жарнаманы әлеуметтік желілерде жүргізуге қажетті білім берді. Әзірге жарнама берген жоқпын, бірақ жоспарымда бар, бәрі алда», – дейді Жұлдыз.
Ол оқытудың қолжетімділігіне ерекше тоқталды.
«Барлық оқу материалы да, курстың өзі де тегін. Бұл – өз ісін бастағысы келетін, бірақ қаржылық мүмкіндігі шектеулі адамдар үшін үлкен қолдау.
Курстарда біз пікірлес адамдармен танысып, оқытушылардан үлкен қолдау аламыз, олар оқуымыз аяқталғаннан кейін де тұрақты байланыста болады», – дейді ол.
Сонымен қатар жобада оқуға 16 жастан бастап рұқсат етілуі маңызды екенін атап өтті.
«Бүгінде оқуға 16 жастан қабылданатыны өте маңызды. Менің 16 жастағы қызым «Бариста» курсынан өтті және жазда кофеханада жұмыс істеді, оған өте ұнады. Бұл – жасөспірімдер үшін үлкен мүмкіндік», – деді ол.
Қазір Жұлдыз ательесін үйіне көшіріп, үйден жұмыс істейді.
Жазда қыздарға мектепке арналған шалбарлар тіккен, енді оларды Kaspi арқылы сатуды жоспарлап отыр.
Клиенттері – негізінен таныстарының ұсынысы арқылы келеді. Қазір оның екі тұрақты жұмысы бар, сондықтан ательеге толық уақыт бөле алмай жүр, бірақ алдағы жарты жылда бар уақытын кәсібіне арнауды жоспарлап отыр.
Жұлдыз сонымен қатар ателье парақшасын дамыту үшін «SMM» мен «Графикалық дизайн» курстарынан өтуді қалайтынын айтты. Оның пікірінше, бұл курстарға ересектерді қабылдауды кеңейту қажет, себебі олар – кәсіп бастаушыларға қажетті базалық дағдылар.
«Мен үшін курстар – жаңа мүмкіндіктер мен жаңа бастамалар. Ең бастысы – ниет. Өзімнің барлық танысыма JOLTAP жобасын ұсынамын және ұйымдастырушыларға, мемлекетке осы бастама үшін алғыс білдіремін. Жоба жалғасып, ауқымы кеңейеді деп сенемін», – деді Жұлдыз қорытындылай келе.