Астаналық Мерей Мәулетқанов әлем чемпионатында қола жүлде алды

Астана қаласының спортшысы Мерей Мәулетқанов 23 жасқа дейінгі әлем чемпионатының қола жүлдегері атанды.

Күрес түрлерінен Сербияның Нови-Сад қаласында өтіп жатқан 23 жасқа дейінгі жаһандық додада ел қоржынына алғашқы жүлде түсті, деп хабарлайды Астана әкімдігінің ресми сайты.

Грек-рим күресінен 72 келіде сынға түскен жерлесіміз қола жүлде үшін таласта бейтарап спортшы Данил Григоревті мерзімінен бұрын жеңді.

Жарыс барысында Мерей Болгария балуаны Сергей Стоевты 8:0, Түркия спортшысын 9:0 есебімен бет қаратпай жеңсе, жартылай финалдық тартысты белдесуде Өзбекстан өкілі Аброр Атабаевқа 1:3 есебімен жол берген еді.

Айта кетейік, 22 жастағы Мәулетқанов өткен айда ғана ересектер арасындағы дүниежүзілік бәсекеде әлем чемпионы және Париж Олимпидасының жүлдегерін ұтып, сенсация жасаған еді. Нәтижесінде ол 5-орынға тұрақтаған болатын.