Астана әкімдігінің гранттары түлектерді тұрақты жұмыспен қамтып отыр

Астана қаласы әкімдігінің білім гранты иегері атанған түлектер оқуын аяқтап, елорданың түрлі білім беру ұйымдарында табысты еңбек жолын бастады, деп хабарлайды елорда әкімдігінің ресми сайты.

Жас педагог Асар Асқарұлы өз әсерімен бөлісті:

«Мектептегі ұстаздарымның жол көрсетуімен Астана қаласы әкімдігінің грантына қатысып көрдім. Осылайша конкурсқа құжаттарымды тапсырып едім, 2021 жылы грант иегері атандым. Сол жылы ЖОО табалдырығын аттап, 2025 жылы оқуымды тәмамдадым. Грант бойынша оқысам, жұмыс та болатыны айтылды. Жақында Астанада жаңадан ашылған №100 орта мектепке физика пәні бойынша жұмысқа орналастым», – дейді жас маман.

Айта кетейік, Астана әкімдігі 2018 жылдан бері жыл сайын жоғары және жоғары оқу орнынан кейінгі білімі бар кадрларды даярлауға білім гранттарын бөліп келеді. Биылдың өзінде әкімдік гранты бойынша 515 түлек мамандығын тәмамдады. Оның ішінде 385 түлек – педагогикалық бағытта білім алған.

Қазіргі таңда елорданың мектептері жас кадрлармен толықтырылып жатыр. Әсіресе, жас мұғалімдердің 80%-ы қаладағы білім беру ұйымдарына жұмысқа орналасып үлгерді. Бұл бастама жастардың кәсіби дамуына жол ашып қана қоймай, елорданың білім беру саласына тың серпін беріп отыр.