Астанада «Жасыл ел» еңбек маусымының жабылу салтанаты Конституция күні қарсаңында өтеді

«Таза Қазақстан» республикалық экологиялық акциясы аясында және еліміздің Конституциясы қабылданғанына 30 жыл толуына орай, Астанада студенттік құрылыс және жастар еңбек жасақтарының XXI еңбек маусымының жабылу салтанаты өтеді. Іс-шара 29 тамыз күні «Жастар» сарайында ұйымдастырылады, деп хабарлайды елорда әкімдігінің ресми сайты.

«Жасыл ел» бағдарламасы 2005 жылдан бері жүзеге асып келеді. Осы уақыт ішінде елордалық штаб қала үшін әлеуметтік маңызы бар жұмыстарға елеулі үлес қосып, 14-тен 35 жасқа дейінгі жастарды жазғы кезеңде еңбекпен қамтып отыр.

Салтанатты рәсім барысында еңбек маусымының белсенді қатысушылары «Үздік команда», «Үздік командир» және «Үздік жауынгер» номинациялары бойынша марапатталады. Олар алғыс хаттар мен бағалы сыйлықтарға ие болады.

Жыл сайын бағдарламаға Астанада мыңдаған жас қатысады. Олар қаланы көгалдандыруға, аумақтарды абаттандыруға, саябақтар мен мектеп аулаларын тазалауға үлес қосып, елорданың көркін кіргізіп келеді.

Биыл «Жасыл ел» бағдарламасы аясында елордада шамамен 5200 жас еңбекпен қамтылды. Олардың қатарында көпбалалы және әлеуметтік осал отбасылардан шыққан балалар да бар.

«Жасыл ел» жасақшылары жаз бойы қаланы көгалдандыруға, саябақтар мен білім беру ұйымдарының аумақтарын тазалауға белсене атсалысты.

Бұл жастар үшін табыс табумен қатар, отансүйгіштікке, еңбексүйгіштікке және елінің болашағына жауапкершілікпен қарауға баулитын нағыз мектеп болды.

#ТазаҚазақстан  #экология  #TazaChallenge @TazaQazaqstan