Тимбилдинг, мастер-класстар мен тренингтер: нашақорлықтың алдын алу жөнінде елордалық волонтерлерге арналған форумы қалай өтіп жатыр
«Астана Жастары» орталығы елордалық Жастар саясаты мәселелері басқармасының қолдауымен үш күндік жастар форумын өткізіп жатыр. Форум Ақмола облысына қарасты Аршалы ауданының «Beibarys» демалыс аймағында өтіп жатыр, деп хабарлайды Астана әкімдігінің ресми сайты.
Форумның мақсаты – психоактивті заттарды қолданудың зияны туралы ақпараттандыруды арттыру, салауатты өмір салтының құндылықтарын қалыптастыру, сондай-ақ мектеп оқушылары, студенттер мен жұмыс істейтін жастар арасында тұрақты алдын алу шараларын дамыту.
Форумға шамамен 100 белсенді волонтер қатысуда, олардың қатарында қалалық волонтерлік штабтың өкілдері де бар. Бағдарламада сарапшылармен панельдік сессиялар, тренингтер, диалог алаңдары, мастер-класстар, тимбилдингтер, спорттық және шығармашылық іс-шаралар бар.
«Үш күн бойы жастар мазмұнды білім беру және бос уақытты тиімді өткізу процесіне тартылған. Бағдарламада тренингтер, панельдік сессиялар, диалог алаңдары мен тимбилдингтер бар», – деді «Астана жастары» ЖРО қызметкері Олжас Амангелді.
Форумға жыл бойы алдын алу бастамаларына қатысқан волонтерлер келді: олар наркограффитиді бояды, әлеуметтік роликтер түсірді, буклеттер тарату акцияларын өткізді.
«Мен үшін бұл лагерьге қатысу – үлкен құрмет. Біз мұнда командалық ойындарға қатысамыз, нашақорлыққа қалай қарсы тұру керектігін, қиын жағдайларда дұрыс әрекет етуді үйренеміз. Көп пайдалы білім алдым және осындай мүмкіндік жасаған ұйымдастырушыларға алғыс айтамын», – деді форум қатысушысы Ілияс Жақсылық.
Кездесуге қатысушы Алтын Далтай қарым-қатынастың маңыздылығын ерекше атап өтті.
«Мен үшін бұл лагерь нағыз мектеп болды. Мұнда достық пен сыйластық орнаған. Біз өзара танысамыз, тәжірибе алмасамыз, жаңа білім аламыз және сонымен бірге уақытты қызықты әрі пайдалы өткіземіз. Оның маңызы зор, себебі дәл осындай жобалар арқылы салауатты әрі белсенді ұрпақ қалыптасады», – деп атап өтті ол.
Форум аясында сарапшылар, жаттықтырушылар мен коучтардың қатысуымен төрт диалог алаңы өтті. Онда нашақорлықтың алдын алу, денсаулық мәдениетін қалыптастыру және жастар бастамаларын дамыту мәселелері талқыланды. Қатысушылар тек тыңдап қана қоймай, пікірталасқа белсене араласып, идеяларын ұсынып, өз тәжірибесімен бөлісті.
Форум қазақстандық эстрада жұлдыздарының қатысуымен өтетін Open Air концертімен аяқталады.
#законипорядок #заңжәнетәртіп