Астанада Конституцияның маңызы мен этносаралық келісімге арналған дөңгелек үстел өтті
Астанадағы Достық үйінде елдің Негізгі заңы қабылданғанына 30 жыл толуына орай өткен дөңгелек үстелде мемлекеттік құрылымның іргетасы ретінде Конституцияның рөлі талқыланды. Іс-шараны Respublica партиясы елордадағы Қазақстан халқы ассамблеясы филиалының қолдауымен ұйымдастырды, деп хабарлайды Астана қаласы әкімдігінің ресми сайты.
«Конституция және Қазақстан халқы ассамблеясы: Respublica партиясының тәжірибесі, құндылықтары және көзқарасы» атты дөңгелек үстелге ҚР Парламентінің депутаттары, мемлекеттік органдардың өкілдері, ғылыми қауымдастық, қоғамдық бірлестіктер мен жастар ұйымдарының мүшелері жиналды.
Қатысушылар Конституцияның мемлекеттік құрылымның іргетасы ретіндегі маңызын, Қазақстан халқы ассамблеясының этносаралық келісімді сақтаудағы үлесін, сондай-ақ жауапты азаматтық қоғам қалыптастыруды талқылады.
Кездесудің модераторлары – Respublica партиясының елордалық филиалының төрағасы Шыңғыс Түсіпбаев пен Астана қалалық ҚХА медиаорталығының жетекшісі Равиль Валеев құттықтау сөз сөйлеп, Конституция мен Ассамблеяның көпұлтты Қазақстанның тұрақтылығы мен үйлесімді дамуын қамтамасыз ететін стратегиялық маңызды екі институт екенін атап өтті.
Жазушы, Respublica партиясының Астана қаласындағы әйелдер қанатының өкілі Сауле Сағади Конституция қазақстандық мемлекеттіліктің іргетасы болып қала беретінін еске салды.
«Конституция – бұл елдің басты заңы, мемлекет пен халық арасындағы бірге өмір сүру туралы келісім. Дәл осы құжатта азаматтардың, оның ішінде әйелдер мен балалардың құқықтары бекітілген. Бұл құжатсыз құқықтық жүйенің жұмысы мүмкін емес. Қазақстан халқы ассамблеясы – әлемде баламасы жоқ бірегей қоғамдық институт. Оның арқасында елде 130-дан астам этнос өкілдері арасында ашық диалог жүргізуге мүмкіндік беретін платформа қалыптасқан», – деді спикер.
Respublica партиясы орталық аппараты басшысының орынбасары Игорь Копайло қазіргі Қазақстанның саяси дамудың жаңа кезеңіне аяқ басқанын атап өтті. Оның айтуынша, қазір азаматтардың мемлекеттік шешімдер қабылдау ісіне қатысуын кеңейту айрықша маңызды.
«Біз өзгерістер дәуірінде өмір сүріп жатырмыз. Соңғы жылдары болып жатқан оқиғалар – жай ғана жаңару емес, мемлекет пен қоғам арасындағы өзара қарым-қатынастың сапалық жаңа моделіне көшу. Партия ашық диалог пен адал саяси бәсекелестікті қолдайды», – деді ол.
Қазақстан халқы ассамблеясының мүшесі, Л.Н. Гумилев атындағы Еуразия ұлттық университетінің қауымдастырылған профессоры Халил Маслов өз кезегінде іс-шара тек Конституция мерейтойына ғана емес, сондай-ақ Негізгі заң мен Ассамблея сияқты маңызды институттардың қоғам өміріндегі рөлін түсінуге арналды деп атап өтті.
«Бүгін біз саясат пен азаматтық бірліктің тоғысқан тұсындағы маңызды мәселелерді талқыладық. Оған депутаттар, республикалық партиялардың мүшелері, сарапшылар мен ҚХА өкілдері қатысты. Әрине, басты назар Конституция мен Ассамблеяның тұрақтылықты қамтамасыз ететін қуатты екі институт ретіндегі өзара байланысына аударылды», – деді Маслов.
Оның айтуынша, талқылаудың басты тақырыптарының бірі – ортақ шаңырақ астында өмір сүріп жатқан халықтар бірлігін нығайту болды.
«Біздің Конституциямыз – әділ әрі мызғымас негіз, ол тұрақтылық пен өркендеуді қамтамасыз етеді. Оның арқасында біз тек құқықтар туралы ғана емес, сонымен қатар этносаралық келісім жөнінде де барлық қазақстандықты біріктіретін нақты құндылық ретінде айта аламыз», – деп толықтырды ол.
Кездесу соңында ҚР Парламентінің депутаттарына елордалық Ассамблея тарапынан диалогты дамытуға қосқан үлестері үшін естелік сыйлықтар табыс етілді. Бұдан бөлек, партияның жаңа мүшелеріне салтанатты түрде партия билеттері берілді.