С.Сейфуллин мұражайының қызметкерлері «Таза Қазақстан» акциясын қолдап, жалпы тазалық жұмысын жүргізді

Ауқымды экологиялық бастама – «Таза Қазақстан» аясында елордадағы Сәкен Сейфуллин мұражайы аумағында «Таза мұражай – таза болашақ» атты акция өтті. Іс-шараны мәдениет басқармасы елорданың мәдени нысандарында тазалықты сақтап, қолайлы орта қалыптастыру мақсатында ұйымдастырды, деп хабарлайды Астана қаласы әкімдігінің ресми сайты.

«Таза мұражай – таза болашақ» бастамасы «Таза Қазақстан. Астана – тазалық пен тәртіптің үлгісі» атты кең ауқымды экологиялық акцияның бір бөлігіне айналды.

Акция барысында мұражай қызметкерлері ғимарат маңын абаттандырып, аумақты қоқыстан тазартты, жасыл желектерге санитарлық күтім жасады. Сондай-ақ мұражай ғимаратының ішінде және ескерткіштер жанындағы алаңдарда да тазалық жүргізілді.

«Табиғатқа ұқыпты қарау мен тазалықты сақтау – бұл тек экологиялық қажеттілік қана емес, азаматтық мәдениеттің маңызды бөлігі. Әр адам өз айналасындағы тазалыққа жауапкершілікпен қарағанда, ол бүкіл қоғамның саналы әрекетіне айналады», – деп атап өтті ғылыми қызметкер Азамат Серікұлы.

Оның айтуынша, акция түрлі жастағы адамдарды біріктіріп, табиғатты ғана емес, елорданың мәдени келбетін сақтауға қоғамның белсенді қатысуына тамаша үлгі болды.

#ТазаҚазақстан #экология #TazaChallenge @TazaQazaqstan