Елордалық спортшы Сабрина Байжігітова жастар арасында GTF таэквондодан әлем чемпионы атанды

Біріккен Араб Әмірліктерінің Әл-Айн қаласында 15-17 жас аралығындағы жастар арасында GTF таэквондодан әлем чемпионаты өз мәресіне жетті. Аталған турнирге әлемнің 25 елінен 600-ден астам спортшы қатысты. Бұл сында елордалық спортшы қарсыластарынан үздік шықты, деп хабарлайды елорда әкімдігінің ресми сайты.

Қазақстан құрамасы бұл беделді турнирде лайықты өнер көрсетті. Атап айтқанда, елордалық спортшы Сабрина Байжігітова 40 кг дейінгі салмақ дәрежесінде бақ сынады. Ол жоғары деңгейдегі дайындығын, шеберлігін, төзімділігін және жеңіске деген жігерін көрсете білді.

Чемпиондық атақ үшін болған тартысты жекпе-жектерде Сабрина алтын медальға үмітті өзге елдердің үздік спортшыларымен күш сынасты. Алайда сенімділік пен нағыз спортшыға тән мінез көрсеткен ол финалда ресейлік қарсыласынан айқын басым түсіп, турнирдің барлық кезеңінен сүрінбей өтті.

Жалпыкомандалық есеп бойынша Қазақстан құрамасы әлемнің үздік үш командасының қатарына еніп, таэквондоның қазақстандық мектебінің жоғары деңгейін тағы бір мәрте дәлелдеді.