«Жасыл жол – Ұрпаққа аманат»: Астанада зейнеткерлер арасында велошеру өтті

Астанада «Жасыл жол – Ұрпаққа аманат» экологиялық акциясы аясында зейнеткерлер арасында велошеру ұйымдастырылды, деп хабарлады елорда әкімдігінің ресми сайты.

Орталық саябақ аумағында өткен спорттық шарада 70-тен астам елордалық зейнеткер белсенділік танытты.

«Нұра ауданымен бірге ұйымдастырылып жатқан шарамыз алғаш рет өтіп жатыр. Бұл жердегі ерекшелік – ешқандай жеңімпаз болмайды. Ең бастысы егде жастағы азаматтарымызды салауатты өмір салтын ұстануға шақыру», – деді Астана қаласы әкімдігінің Спорттық-бұқаралық іс-шараларды өткізу дирекциясының маманы Гүлнұр Базарханова.

Спорттық мереке барысында қатысушылар тек велосипед теуіп қана қоймай, сайысқа түскен аумақты жинап, тазалықтың сақталуына үлес қосты.