Байқоңыр ауданында Балаларды қорғау күні 10 жаңа аула пайдалануға берілді

Халықаралық балаларды қорғау күні елорданың Байқоңыр ауданында 10 жаңа аула ашылып, тұрғындар мен балалар үшін мерекелік іс-шаралар ұйымдастырылды, деп хабарлайды Астана қаласы әкімдігінің ресми сайты.

Жаңа аулалар мына мекенжайлар бойынша ашылды: Сейфуллин көшесі, 41; Бейсекбаев көшесі, 14; Сембинов көшесі, 21; Ғабдуллин көшесі, 1; Торайғыров көшесі, 3; Уәлиханов көшесі, 3; Рахимов көшесі, 91; Шонайұлы көшесі, 39 және 41; Жұбанов көшесі, 3; Торайғыров көшесі, 1.

Аулаларда жаңа ойын және спорт алаңдары, демалыс аймақтары орнатылды.
Ашылуға орай аулаларда балалар мен ата-аналар үшін мерекелік шаралар өтті. Тұрғындар алғыс білдіріп, тәттілер тарату іс-шарасын ұйымдастырды.

Айта кетейік, 2025 жылы Байқоңыр ауданында 88 аула абаттандырылады. Оның ішінде 18 аула кешенді түрде жөнделсе, 70 аулада жөндеу-қалпына келтіру жұмысы жүргізіледі. 18 ауланың 12-сі «Халық қатысатын бюджет» жобасы аясында абаттандырылып жатыр.

Жалпы, биыл елордада 180-нен астам аула мен қоғамдық кеңістік абаттандырылмақ.