Астаналықтар JOLTAP жобасы аясында видеомонтаж жасауды үйрене алады
JOLTAP жобасы аясында елорда тұрғындары еңбек нарығында сұранысқа ие мамандықтарды тегін меңгере алады. Осындай өзекті бағыттардың бірі ретінде жаңадан бастаған мамандар үшін «Видеомонтаж» мамандығы бойынша оқыту жүргізіліп жатыр, деп хабарлайды Астана қаласы әкімдігінің ресми сайты.
Видеомонтажды оқыту 12 күн бойы күніне екі сағаттан өтеді және теория мен үй тапсырмасы бар практикалық жаттығуларды қамтиды.
Орта есеппен әр топта 15-тен 20 адамға дейін білім алады.
«Видеомонтаж» мамандығының оқытушысы Сабина Мырзабекованың айтуынша, курсқа қатысушылар жоғары деңгейде ынта танытып отыр.
«Оқушылардың басым бөлігі – 20-30 жас аралығындағы жастар. Біздің міндетіміз – тек теориялық білім беріп қана қоймай, оны тәжірибеде қалай қолдану керектігін де көрсету. Біз нақты кейстерді талдап, студенттер оқуды аяқтағаннан кейін бірден қолдана алатын құралдарды ұсынамыз. Бұл студенттердің кәсіби мотивациясын қалыптастырады», – деп атап өтті ол.
Бағдарлама аясында студенттер тек видеомонтаждың негіздерін ғана емес, сонымен қатар камерамен жұмыс істеу дағдыларын да меңгереді. Осылайша, олар түсірілімнен бастап дайын бейнероликке дейінгі бүкіл процесті үйренеді.
Курс түлегі Кирилл Бадаев оқуға дейін видеоны тек телефонда монтаждағанын, ал компьютерде жұмыс істеу тәжірибесі болмағанын айтты.
«12 күн ішінде компьютерде монтаждаудың негізгі дағдыларын меңгеріп, әртүрлі құрылғыларда жұмыс істеуді үйрендім. Бұл менің қызметімнің аясын айтарлықтай кеңейтіп, контентімнің сапасын арттыруға мүмкіндік берді. Әсіресе, оқытушылардың тәжірибелік кеңестері мен кәсіби өмірден алған оқиғалары өте құнды болды. Әрине, шынайы тәжірибе – тек практикалық жұмыспен келеді, бірақ курста берілетін база – шынымен де сапалы», — деп өз пікірімен бөлісті астаналық.
Бұл мамандыққа JOLTAP жобасы аясында өткен жылдың басынан бері оқыту жүргізілуде. Осы уақыт ішінде 230-дан астам адам курстан өтті. Түлектер алған дағдыларын кәсіби қызметте сәтті қолдануда.
JOLTAP жобасы еңбек нарығының заманауи талаптарына жауап беретін білім беру бағдарламаларын дамытуын жалғастырып, жас мамандардың сұранысқа ие құзыреттерді игеріп, өз карьерасын сенімді құруына көмектесуде.