Астанада VII пара спартакиада өтеді

Елорда төрінде 30 мамыр мен 12 маусым аралығында тірек-қимыл аппараты, көру мүшесі зақымданған және зияткерлік даму ерекшеліктері бар спортшылар арасында Қазақстан Республикасының VII Пара спартакиадасы өтеді, деп хабарлайды Астана әкімдігінің ресми сайты.

Жалпы спартакиада 17 спорт түрінен өтеді. Оның ішінде 7 спорт түрінен жарыстар елордада ұйымдастырылады. Атап айтқанда: волейболды отырып ойнау, пара таэквондо, пара дзюдо, бочча, пара би, пара садақ ату және пара каратэ.

Биылғы Спартакиадаға еліміздің 19 өңірі мен қалаларынан 2000-ға жуық спортшы қатысады. Ерекше атап өтерлігі, 2025 жылы алғаш рет зияткерлік даму ерекшеліктері бар спортшылар да жарысқа қатысады. Олар жүзу, жеңіл атлетика және үстел теннисі бойынша өз шеберліктерін көрсетеді.

«Астана қаласы VII Пара спартакиаданың негізгі ұйымдастырушы әрі қабылдаушы өңірі ретінде жарыстың басым бөлігін өз алаңдарында өткізеді. Ал қалған жарыстар 30 мамыр мен 30 маусым аралығында Ақмола, Алматы, Жамбыл және Шығыс Қазақстан облыстарында ұйымдастырылады.

Елордадан 189 спортшы қатысып, қаламыздың намысын қорғайды. Олардың қатарында елімізге танымал бірқатар спортшы бар. Атап айтсақ, пара дзюдодан – Ақмарал Науатбек, Ерғали Шамей, Асылан Нұрдәулетов, пара жүзуден – Сиязбек Далиев пен Али Тұрғанбек, пара оқ атудан – Севда Алиева, ал жеңіл атлетикадан – Айсұлу Сүлейменова», – дейді Астана қаласы әкімдігінің «Мүмкіндігі шектеулі тұлғаларға арналған «Елорда» спорт клубы» КММ басшысы Азамат Тағаев.

Айта кетейік, Спартакиаданың салтанатты ашылуы 4 маусым күні Ж.Үшкемпіров атындағы «Жекпе-жек» сарайында өтеді. Ал жабылу салтанаты 30 маусым күні Өскемен қаласында өтіп, спартакиада жеңімпаздары анықталады.