Астанадағы Мағжан Жұмабаев атындағы Халықаралық жоғары колледжі биылдан бастап алғаш рет «Жеке сүйемелдеуді ұйымдастыру (деңгейлеріне сәйкес)» білім беру бағдарламасы бойынша «Педагог-ассистент» біліктілігіне талапкерлерді қабылдай бастады, деп хабарлайды елорда әкімдігінің ресми сайты.
Жаңа мамандық Қазақстанда инклюзивті білім беруді дамыту, ерекше білім беру қажеттіліктері бар балаларға сапалы қолдау көрсету және психологиялық-педагогикалық сүйемелдеу жүйесін жетілдіру жөніндегі мемлекеттік саясат аясында ашылып отыр.
Педагог-ассистент білім алушының оқу үдерісіне бейімделуіне, оқу әрекетін ұйымдастыруына, қоршаған ортамен қарым-қатынас жасауына және өз бетінше әрекет ету дағдыларын дамытуына қолдау көрсететін маман. Бұл біліктілік техникалық және кәсіптік білім беру мамандықтары мен біліктіліктерінің жіктеуішіне енгізілген, ал педагог-ассистент лауазымы педагог қызметкерлер тізбесіне кіреді.
Бүгінде мектептерде, мектепке дейінгі ұйымдарда, инклюзияны қолдау кабинеттерінде, түзету және дамыту орталықтарында осындай мамандарға сұраныс артып келеді. Сондықтан колледж тәжірибеге бағытталған білім беру арқылы педагогика, психология және инклюзивті білім беру саласында білікті мамандар даярлауды көздейді.
Жаңа білім беру бағдарламасы балалардың жеке білім беру қажеттіліктерін ескеретін, қауіпсіз әрі қолайлы білім беру ортасын қалыптастыруға үлес қосады. Сонымен қатар болашақ түлектер ерекше білім беру қажеттіліктері бар балаларға кәсіби қолдау көрсетіп, педагогтермен және ата-аналармен бірлесіп жұмыс істей отырып, білім беру ұйымдарындағы психологиялық-педагогикалық сүйемелдеу сапасын арттыруға ат салысады.
Астанада тапсырысты автономды түрде жеткізетін жаңа сервис тестілік режимде іске қосылды. Жобаның алғашқы кезеңінде Есіл және Нұра аудандарының тұрғындары «Яндекс Лавка» сервисінен тапсырысты жаяу жүргіншілер инфрақұрылымы арқылы өздігінен қозғалатын робот-курьерлердің көмегімен тегін ала алады, деп хабарлайды елорда әкімдігінің ресми сайты.
Пилоттық жоба елорда әкімдігі, қалалық Полиция департаменті, «Astana Innovations» АҚ және Yandex Qazaqstan компаниясының бірлесуімен, Жасанды интеллект және цифрлық даму министрлігінің қолдауымен жүзеге асырылып жатыр.
Робот арқылы тегін жеткізу қызметіне «Яндекс Go» қосымшасының «Лавка» бөлімінде тапсырыс беруге болады. Егер көрсетілген мекенжай пилоттық жоба аймағына кірсе, пайдаланушы тапсырыс рәсімдеу кезінде кәдімгі курьерді немесе робот-курьерді таңдай алады.
Роботпен жеткізу үшін қосымша ақы алынбайды.
Робот тұрғын үйге дейін жаяу жүргіншілер бағытымен келіп, кіреберіс алдындағы тротуарда немесе ең жақын қолжетімді орында тоқтайды.
Пайдаланушы оның қозғалысын қосымша арқылы бақылап, келгеннен кейін смартфонның көмегімен жүк бөлігін ашып, тапсырысын ала алады.
Роботтар навигация жүйелері, компьютерлік көру және нысандарды тану технологияларының көмегімен бағытты өздігінен құрып, айналасындағы жағдайды талдайды. Олар кедергілерді анықтап, айналып өтеді, жаяу жүргіншілерге жол береді, қажет болған жағдайда жылдамдығын бәсеңдетіп, қауіпсіз тоқтай алады. Орташа қозғалыс жылдамдығы шамамен сағатына 6 шақырымды құрайды.
Бағдарламалық қамтамасыз ету мен датчиктер жүйесінің арқасында роботтар түрлі ауа райы жағдайында да жұмыс істей алады.
Айта кетейік, жобаның алғашқы сынақ режимінде іске қосылуы 2026 жылғы 15 шілдеде өтті. Мамандар роботтардың қала көшелеріндегі қозғалысын, жаяу жүргіншілермен және инфрақұрылым нысандарымен өзара әрекеттесуін, сондай-ақ қауіпсіз пайдалану тетіктерін тексерді.
«Астанада тұрғындарға арналған қалалық сервистерді қолжетімді әрі ыңғайлы ету үшін заманауи технологияларды кезең-кезеңімен енгізіп келеді. Бұл жоба аясында біз автономды жеткізу қызметінің қалалық инфрақұрылым жағдайындағы жұмысын бағалаймыз. Негізгі назар қауіпсіздікке, сервистің сенімділігіне және пайдаланушылардың өзара байланысына аударылады.
Алынған нәтижелер елордада автономды жеткізу қызметін одан әрі дамытуға негіз болады», – деді Astana Innovations басқарма төрағасы Ғизат Әмірғали.
Пилоттық жобаның іске қосылуы елорда тұрғындары мен қонақтарына тапсырыс жеткізудің жаңа технологиялық форматын күнделікті өмірде пайдаланып көруге мүмкіндік береді. Жоба кеңейген сайын қызмет көрсету аумағы да ұлғаяды.
«Бүгінде елді цифрлық трансформациялау бойынша ауқымды міндеттер жүктеліп отыр. Мемлекет басшысының бастамасымен 2026 жыл Жасанды интеллект және цифрландыру жылы болып жарияланды. Сонымен қатар биыл Digital Qazaqstan стратегиясы қабылданып, онда ұшқышсыз технологияларды дамыту цифрлық трансформацияның негізгі бағыттарының бірі ретінде айқындалды. Робот-курьерлердің пилоттық іске қосылуы – инновациялардың әзірлеу кезеңінен күнделікті қолданысқа өткенінің нақты мысалы. Біздің міндетіміз – осындай шешімдерді дамытуға және оларды қалалық инфрақұрылымға қауіпсіз енгізуге жағдай жасау», – деді Жасанды интеллект және цифрлық даму вице-министрі Ғиззат Байтұрсынов.
Қазақстанда жол қозғалысы ережелеріне ауқымды өзгерістер кезең-кезеңімен енгізіліп жатыр. Оның басты мақсаты – жол қауіпсіздігін арттыру, жол-көлік оқиғаларының санын азайту және азаматтардың өмірі мен денсаулығын сақтау. Бұл туралы елорданың Коммуникациялар қызметінде өткен брифингте Астана қаласы Полиция департаменті Әкімшілік полиция басқармасының бастығы, полиция полковнигі Нұрлан Уваев мәлімдеді, деп хабарлайды қала әкімдігінің ресми сайты.
Спикердің айтуынша, биыл наурыз айынан бастап Астанада «Сергек» жүйесімен қатар «Presight AL LTD» ЖШС-нің заманауи интеллектуалды кешендері қолданылып келеді. Олар Жол қозғалысы ережелерінің 15-ке дейінгі түрлі бұзушылығын автоматты түрде анықтай алады.
Жаңа кешендерді кезең-кезеңімен енгізу аясында қауіпсіздік белдігін тақпай көлік жүргізудің 20 мыңнан астам дерегі, көлік тізгінінде отырып ұялы телефон пайдаланудың шамамен 2,5 мың фактісі және жүргізушілердің жаяу жүргіншілерге жол бермеген 127 жағдайы тіркелген.
Қазіргі уақытта жүйені кеңейтуге арналған монтаждау және техникалық жұмыс жалғасып жатыр.
Полиция департаментінің өкілі жаңа камералар жаңа айыппұл түрлерін енгізбейтінін атап өтті. Олар заңнамада бұрыннан көзделген құқық бұзушылықтарды ғана автоматты түрде тіркейді.
«Вафельді» жол таңбасының негізгі мақсаты – қиылыстардың бітелуіне жол бермеу және көлік қозғалысының үздіксіздігін қамтамасыз ету. Жүргізуші қиылысқа оны толық кесіп өте алатынына сенімді болған жағдайда ғана кіруі тиіс. Егер алда кептеліс болып, қиылыста тоқтап қалу қаупі болса, қиылысқа кіруге болмайды.
Бұл талапты бұзғаны үшін Әкімшілік құқық бұзушылық туралы кодекстің 594-бабының 1-бөлігіне сәйкес 3 АЕК мөлшерінде айыппұл қарастырылған.
2026 жылғы 1 шілдеден бастап электросамокаттарды жүргізу құқығы жоқ адамдарға оларды пайдалануға берген операторлардың жауапкершілігін көздейтін өзгерістер күшіне енді.
Кикшеринг жүйесіндегі электросамокаттарды мемлекеттік тіркеу және мемлекеттік тіркеу нөмірін беру міндеттелді. Оларды тек А1, А немесе В санатындағы жүргізуші куәлігі бар азаматтар ғана жүргізе алады.
2026 жылғы 25 тамыздан бастап электросамокаттардың тротуарлармен және жаяу жүргіншілер жолымен жүруіне тыйым салынады. Олар велосипед жолымен, ал ондай жол болмаған жағдайда жолдың оң жақ шетімен жүруі тиіс. Бұл талаптарды бұзғаны үшін ӘҚБтК-нің 615-бабына сәйкес жауапкершілік көзделген.
Конструкциялық жылдамдығы сағатына 50 шақырымнан асатын мотовелосипедтер мопедтерге теңестіріліп, міндетті мемлекеттік тіркеуге жатады. Электросамокатпен және мотовелосипедпен жүрген кезде қорғаныс құралдары мен жарық шағылыстыратын элементтерді пайдалану міндетті», – деді спикер.
Сонымен қатар полиция «Сергек» компаниясымен бірлесіп, электросамокаттардың мемлекеттік тіркеу нөмірлерін автоматты түрде танитын және жол қозғалысы ережесін бұзу фактілерін тіркейтін жүйені енгізіп жатыр.
«Полиция азаматтарды Жол қозғалысы ережелерін қатаң сақтауға шақырады. Енгізіліп жатқан өзгерістердің негізгі мақсаты – айыппұл санын көбейту емес, жол-көлік оқиғаларын азайту, азаматтардың өмірі мен денсаулығын қорғау және жол қауіпсіздігін арттыру», – деп түйіндеді спикер.
#законипорядок #заңментәртіп
Астана халықаралық әуежайында Сербияның Нови-Сад қаласында өткен пара нысана көздеуден Әлем кубогында табысты өнер көрсеткен қазақстандық спортшыларды жанкүйерлері салтанатты түрде қарсы алды, деп хабарлайды елорда әкімдігінің ресми сайты.
Дүбірлі додаға әлемнің 51 елінен 291 спортшы қатысты. Жарыс қорытындысы бойынша Қазақстан құрамасы 7 медаль жеңіп алды.
Александр Пасхалиди P1 жаттығуында алтын медаль иеленді.
Ардақ Оторбаев (R1 Team), Айсұлу Мұқашбекова (P2 Team) және Севда Әлиева (P2 Team) күміс жүлдегер атанды.
Ал қола жүлдені Әйгерім Төлегенова (R2 Team), Айсұлу Мұқашбекова (P6 Mix) және Александр Пасхалиди (P6 Mix) жеңіп алды.
Елордаға Қазақстанның паралимпиадалық нысана көздеу құрамасының аға жаттықтырушысы Михаил Бурчалин бастаған 7 спортшы оралды.
Әуежайда жеңімпаздарды туған-туыстары, жанкүйерлер, спорт қауымдастығының өкілдері мен мемлекеттік ұйым қызметкерлері қарсы алды.
Спортшыларға гүл шоқтары табысталып, Мемлекеттік Ту көтеріліп, ұлттық әуендер шырқалды.
«Қазақстанда пара нысана көздеу спорты қарқынды дамып келеді. Әлем кубоктарында көрсеткішіміз жыл сайын жақсарып келеді. Сегіз ай бұрын 8 медаль жеңіп алып рекорд орнатсақ, бұл жолы 12 медаль еншіледік. Бұл турнир әлем чемпионаты мен Азия пара ойындарына қатысуға мүмкіндік беретін MQS нормативін орындаудың соңғы мүмкіндігі болды.
Осындай ыстық ықыласпен қарсы алғандарыңыз бізге үлкен күш береді және алдағы жарыстарда бұдан да көп медаль жеңіп алуға жігерлендіреді», – деді Михаил Бурчалин.
Әлем кубогының жүлдегері Севда Әлиева жарыстағы бәсекенің өте жоғары болғанын айтып, қол жеткізген нәтиже ұзақ дайындықтың жемісі екенін атап өтті.
«Бұл өте қиын Әлем кубогы болды. Жарысқа әлемнің түкпір-түкпірінен келген мықты спортшылар қатысты. Олардың көпшілігі бұл спортпен 20-30 жылдан бері айналысады. Сондықтан жеңіп алған медальдардың қадірі ерекше. Біз күн сайын бес сағаттан жаттықтық, соның нәтижесін көрдік.
Алда бізді 2028 жылы Лос-Анджелесте өтетін Паралимпиада ойындарына жолдама берілетін лицензиялық жарыстар күтіп тұр. Осындай жылы қарсы алады деп күтпедім. Бұл өте әсерлі болды. Баршаңызға қолдауларыңыз үшін алғыс айтамын», – деді Севда Әлиева.
Астанада 1-2 тамыз күндері кезекті қалалық ауыл шаруашылығы жәрмеңкесі өтеді, деп хабарлайды елорда әкімдігінің ресми сайты.
Жәрмеңкеде еліміздің әр өңірінен келген жергілікті фермерлер мен өндірушілердің өнімдері ұсынылады. Қала тұрғындары мен қонақтары көкөніс, жеміс-жидек, ет, ұн және сүт өнімдерін, нан-тоқаш, табиғи шырындар, тосап, джем және басқа да тағамдарды тиімді бағамен сатып ала алады.
Іс-шара 1-2 тамыз күндері сағат 10:00-ден 19:00-ге дейін Keryen Joly сауда орталығы аумағында өтеді.
Келушілердің ыңғайы үшін жәрмеңке өтетін орынға №7, 11, 39, 41, 45, 53, 59, 81, 307, 317 автобус маршруттары қатынайды.
Астанада «Заң мен тәртіп» қағидатын іске асыру аясында «Заң түні» әлеуметтік акциясы өтті. Іс-шара барысында елорда тұрғындары мен қонақтары құқықтық мәселелер бойынша тегін кеңес алды, деп хабарлайды елорда әкімдігінің ресми сайты.
Іс-шара «Koktal» сауда-ойын-сауық орталығында Астана қаласы прокуратурасының үйлестіруімен, Сарыарқа ауданы прокуратурасының, аудан әкімдігінің, сондай-ақ мемлекеттік және құқық қорғау органдары өкілдерінің қатысуымен өтті. Бейінді мамандар азаматтардың сұрақтарына жауап беріп, қолданыстағы заңнама талаптарын түсіндірді.
Астана қаласы Сарыарқа ауданының прокуроры, аға әділет кеңесшісі Данияр Ізбасаровтың айтуынша, елорда прокуратурасы биыл осындай акцияны 12 рет өткізуді жоспарлап отыр.
«Бұл акцияның мақсаты — азаматтарға тегін әлеуметтік және құқықтық көмек көрсету. Бүгінгі іс-шараға жергілікті атқарушы органдардың, яғни әкімдіктің, полиция қызметінің және басқа да мемлекеттік мекемелердің өкілдері қатысып, тұрғындарға кеңес беруде. Бүгін мен жеке қабылдауыма келген екі азаматтың өтінішін тыңдадым. Егер азаматтардың мәселелерін заң аясында шешуге мүмкіндік болса, тиісті шаралар қабылдап, мәселенің оң шешілуіне ықпал етеміз. Ал құқықтық кеңес қажет болған жағдайда мамандар қолданыстағы заңнама талаптарын түсіндіреді», — деді ол.
Айта кетейік, мұндай іс-шаралар елордада жүйелі түрде өткізіледі. Олар халықтың құқықтық сауаттылығын арттыруға, заңгерлік көмектің қолжетімділігін қамтамасыз етуге және азаматтардың мемлекеттік және құқық қорғау органдарымен өзара іс-қимылын нығайтуға бағытталған.
#законипорядок #заңментәртіп
Елорданың Есіл ауданының прокуратурасы «Заң мен тәртіп» қағидатын іске асыру аясында MNU университетінде ауқымды құқықтық іс-шара өткізді. Университеттің сот отырысы залында заң факультетінің студенттері сот жүйесінің жұмысымен тәжірибе жүзінде танысты, деп хабарлайды Астана әкімдігінің ресми сайты.
Студенттерге есірткі құралдарының заңсыз айналымына қатысты қылмыстық іс бойынша үлгілік сот процесі көрсетілді.
Сот отырысы белгіленген тәртіпке сай өтті: отырыстың ашылуынан бастап, қатысушылардың құқықтарын түсіндіру, дәлелдемелерді зерттеу, тараптардың жарыссөзі және үкімді жариялауға дейінгі барлық кезең қамтылды.
«Мұндай формат жастарға дәстүрлі дәрістерге қарағанда әлдеқайда тиімді профилактикалық әсер етеді. Студенттер сот процесінде жарыспалылық пен заңдылық қағидаттарының іс жүзінде қалай жүзеге асатынын көргенде, жазаның бұлтартпастығы туралы түсінік олар үшін жай теория емес, нақты шындыққа айналады», – дейді Есіл ауданы прокуратурасының өкілдері.
Бастаманың негізгі мақсаты – студенттерге құқықтық білім беру ғана емес, болашақ заңгерлердің құқықтық санасын қалыптастыру. Өмірлік бағытын айқындап жатқан жастарға заңды елемеудің қандай ауыр әрі қайтымсыз салдарға әкелетінін көрсету аса маңызды.
Нақты сот ісін көрсету арқылы ұйымдастырушылар қылмыстық жолға түскен әрбір қадам адамның болашағын құрдымға жіберетінін, ал елімізде «Заң мен тәртіп» қағидатының бұлжымай орындалатынын көрсетті.
Прокурорлар қазіргі заман заңгерге жоғары талап қоятынын атап өтті. Бүгінде заңгер тек заңдарды жетік білетін маман ғана емес, сонымен қатар жоғары адамгершілік қағидаттарын ұстанатын тұлға болуы тиіс.
«Заң мен тәртіп» қағидаты аясында біз болашақ әріптестерімізден әділдік, адалдық және қандай жағдайда да сатылмайтын ұстанымды күтеміз. Заң үстемдігі әрбір маманның ішкі қағидасына айналуы қажет. Кәсіби біліктілік пен жоғары моральдық құндылықтардың үйлесуі ғана заңгерге азаматтардың құқықтарын тиімді қорғап, елдегі заңдылықты нығайтуға мүмкіндік береді», – деп атап өтті прокуратура өкілдері.
Мұндай іс-шара бір реттік акция емес. Есіл ауданының прокуратурасы жастармен жүйелі түрде жұмыс жүргізіп, тұрақты түрде ашық диалогтар мен кездесулер ұйымдастырып келеді.
Іс-шараға қатысқан студенттер мұндай тәжірибелік формат олардың мамандыққа деген көзқарасын өзгертіп, заңгердің қоғам алдындағы жауапкершілігін тереңірек түсінуге мүмкіндік бергенін айтты.
#законипорядок #заңментәртіп
Астана қаласының Төтенше жағдайлар департаменті елорда тұрғындары мен қонақтарының қауіпсіздігін қамтамасыз ету мақсатында су айдындарында тұрақты түрде профилактикалық рейдтік іс-шаралар өткізіп жатыр, деп хабарлайды қала әкімдігінің ресми сайты.
Рейд барысында азаматтарға судағы қауіпсіздік ережелерін сақтау қажеттігі түсіндіріліп, ақпараттық жадынамалар таратылды. Сондай-ақ Қазақстан Республикасы заңнамасының талаптары мен су айдындарындағы қауіпсіздік қағидалары бойынша түсіндіру жүргізілді.
Рейд қорытындысы бойынша судағы қауіпсіздік талаптарын бұзған азаматтарға қатысты қолданыстағы заңнамаға сәйкес әкімшілік шаралар қолданылды.
Астана қаласының Төтенше жағдайлар департаменті тұрғындар мен қала қонақтарын судағы қауіпсіздік талаптарын қатаң сақтауға, тек арнайы жабдықталған және шомылуға рұқсат етілген орындарда ғана суға түсуге, сондай-ақ балаларды су айдындарының маңында қараусыз қалдырмауға шақырады.
Астана әкімдігінің 2026-2030 жылдарға арналған 300-ден астам білім беру гранты жоғары оқу орындары мен білім беру бағдарламалары бойынша бөлінді, деп хабарлайды елорда әкімдігінің ресми сайты.
Астана әкімдігінің 2026 жылғы 25 мамырдағы №107-1777 қаулысына сәйкес, 2026-2030 жылдарға арналған жоғары және жоғары оқу орнынан кейінгі білім беру кадрларын даярлауға арналған мемлекеттік білім беру тапсырысы аясында 303 білім беру гранты бөлінді.
Мемлекеттік білім беру тапсырысы аясында жоғары оқу орындарына құжат қабылдау 2026 жылғы 5-10 тамыз аралығында өтеді. Астана әкімдігінің білім гранты конкурсына қатысу үшін талапкерлер тиісті жоғары оқу орнының қабылдау комиссиясына өтініш беруі қажет.
Гранттар төмендегі жоғары оқу орындары мен білім беру бағдарламалары бойынша бөлінді:
Л.Н. Гумилев атындағы Еуразия ұлттық университеті:
• Көлік қызметтері.
А. Құсайынов атындағы Еуразия гуманитарлық институты:
• Мектепке дейінгі оқыту және тәрбиелеу.
Astana International University:
• Мектепке дейінгі оқыту және тәрбиелеу;
• Бастауышта оқытудың педагогикасы мен әдістемесі;
• Физика пәні мұғалімдерін даярлау;
• Математика пәні мұғалімдерін даярлау;
• Информатика пәні мұғалімдерін даярлау;
• Орыс тілі мен әдебиеті пәні мұғалімдерін даярлау;
• Көркем еңбек және сызу пәні мұғалімдерін даярлау;
• Ақпараттық технологиялар.
Абай атындағы Қазақ ұлттық педагогикалық университеті:
• Мектепке дейінгі оқыту және тәрбиелеу;
• Бастауышта оқытудың педагогикасы мен әдістемесі;
• Информатика пәні мұғалімдерін даярлау;
• Математика пәні мұғалімдерін даярлау;
• Физика пәні мұғалімдерін даярлау;
• Ақпараттық технологиялар;
• Арнайы педагогтерді даярлау:
o дефектолог;
o логопед;
o тифлопедагог;
o сурдопедагог.
Esil University:
• Информатика пәні мұғалімдерін даярлау;
• Математика пәні мұғалімдерін даярлау;
• Ақпараттық технологиялар.
Елордадағы Бөлекпаев көшесі, 13 мекенжайында «Арманың асқақ болсын!» атты жаңа мурал бой көтерді, деп хабарлайды қала әкімдігінің ресми сайты.
Көркем туынды адамның арманға ұмтылысы, жаңа белестерді бағындыруы және өз мүмкіндігін кеңейтуі идеясын бейнелейді.
Муралдағы ұшақ саяхаттың ғана емес, адамның ішкі өзгерісі мен батыл шешім қабылдауға дайын екенінің символы ретінде көрініс тапқан. Ал гүлденген ағаштар кез келген жетістіктің негізінде даму мен үздіксіз ізденіс жатқанын білдіреді.
Бұл туынды қала кеңістігін көркейтіп қана қоймай, тұрғындар мен қонақтарды биік мақсат қойып, арманына сенуге және жаңа мүмкіндіктерге ұмтылуға үндейді.