Жастар мен мемлекеттік органдар және сарапшылар қауымдастығы арасындағы диалог: Астанада Jastar talks форумы өтті

Астанада «Jastar talks: Ашық диалог» ауқымды жастар форумы өтті. Оның алаңында қоғамды толғандырған өзекті мәселелерді талқылау үшін кәсіпкерлер, қоғам қайраткерлері, жоғары оқу орындары мен колледж студенттері жиналды.

Іс-шараның басты мақсаты өскелең ұрпақ пен мемлекеттік құрылым өкілдері арасында тиімді байланыс орнату болды. Кездесу барысында елорданың Алматы ауданының әкімі Рүстем Тәуекелов жастарды қалалық жобаларға тарту сапалы басқарушылық шешімдер қабылдау үшін шешуші мәнге ие екенін атап өтті.

Форумда көтерілген мәселелердің қатарында жастардың тұрғын үй бағдарламаларының қолжетімділігі, жасанды интеллект саласындағы заманауи трендтер, киберқауіпсіздік және бұқаралық спортты дамыту және т.б. бар.

Жастар алдында Астана қаласының Жастар саясаты мәселелері жөніндегі басқармасының басшысы Самат Ибраев, қалалық мәслихат депутаты Арсланбек Мағзұм, полиция подполковнигі Бауыржан Қамалиев, сондай-ақ «ДАМУ» қорының, «Астана» ӘКК, «Отбасы банкінің» және Joltap жобасының өкілдері сөз сөйледі.

Спикерлер жалпыұлттық «Заң мен тәртіп» нарративі аясында құқықтық мәдениет пен құқық бұзушылықтың алдын алуға ерекше назар аударды.

Кездесу қорытындысы бойынша сарапшылар аудиторияның сұрақтарына жауап беріп қана қоймай, студенттердің ең перспективалы азаматтық және бизнес-бастамаларын кейіннен практикалық қолдау көрсету үшін тіркеп алды.

«Біз үшін мемлекеттік органдар мен жастар арасында ашық диалог орнату маңызды. Сонымен қатар, кездесулер аясында студенттерді өзекті мемлекеттік бағдарламалар, білім беру, жұмысқа орналасу саласындағы мүмкіндіктер және тұрғын үй бастамалары туралы ақпараттандырамыз. Іс-шараға елордалық колледждер мен жоғары оқу орындарының 260-тан астам студенті қатысты. Форум еркін және жанды форматта өтті: жастар спикерлерге белсенді сұрақтар қойып, пікір алмасты және өздерін мазалаған тақырыптарды көтерді. Диалог ашық, мазмұнды және қатысушылар үшін пайдалы болды», – деп атап өтті Алматы ауданының ішкі саясат бөлімінің басшысы Айбын Айдынұлы.

Астана халықаралық университетінің студенті, «Жер амбассадорлары» жастар экологиялық қозғалысының жетекшісі Темірлан Мақыбаев форумды қызықты әрі танымды деп атап, спикерлердің дайындық деңгейінің жоғары екенін ерекше атап өтті.

«Мұндай жобалар жастардың дамуына қуатты қозғаушы күш болып саналады, жаңа идеяларға жол ашады және жаңа буынның перспективалы өкілдерінің өсуіне берік негіз бола алады. Іс-шараның арнайы қонағы Алматы ауданының әкімі болды.

Кездесу қызықты өтті, сарапшылардың – ІІМ және ғылыми интеллигенция өкілдерінің мазмұнды баяндамаларын ерекше атап өтуге болады. Мемлекеттік мекемелер басшыларының тікелей диалогқа шығып, бізбен тікелей тілдесуі өте маңызды — бұл «Халық үніне құлақ асатын мемлекет» тұжырымдамасын іске асырудың ерекше үлгісі.

Мұндай кездесулер барысында көптеген пайдалы ақпараттар білеміз. Пайдалы білім алу және ведомство басшыларына тікелей жүгіну мүмкіндігі біз үшін өте үлкен құндылыққа ие», – дейді студент.

Форум қатысушыларға кәсіби диалог пен сарапшылық ұсынымдарды талқылауға арналған алаң ұсынды.