Елорданың «Астана жастары» жастар ресурстық орталығы «Заң және тәртіп» қағидаты аясында «Жастар» сарайында «Құқық қаласы» атты интерактивті командалық квест өткізді.
Жобаның мақсаты – жастардың құқықтық мәдениетін арттыру, азаматтық жауапкершілігін дамыту және белсенді өмірлік ұстаным қалыптастыру.
Іс-шара ойын түрінде өтті: қатысушылар құқықтық тақырыптар бойынша әзірленген станцияларды өтіп, түрлі тапсырмаларды орындады. Квестке Астана колледждерінің 100 студенті қатысты, әр оқу орнынан бес адамнан құралған бір команда қатысты.
Қатысушылар лудомания, вандализм, буллинг, есірткі тасымалы және нашақорлықтың алдын алу сияқты өзекті тақырыптар бойынша логикалық, зияткерлік және спорттық кезеңдерден өтті. Ойын барысында жастар заң нормаларын өмірлік жағдайларда қолдануды үйреніп, білімдерін тәжірибе жүзінде бекітті.
«Бұл өте пайдалы жоба, біз басқа колледждердің командаларымен достасып, көп нәрсе үйрендік. Интеллектуалды ойындар бізді біріктірді. Ең бастысы, жастар үшін маңызды мәселелер көтерілді. Мұндай іс-шаралар қазіргі қоғамдағы теріс құбылыстарға қарсы тұруға көмектеседі», – деді Раяна есімді қатысушы.
Квест қатысушылары іс-шараның достық көңіл күйде өткенін және пайдалы болғанын атап өтті.
«Маған бұл іс-шара қатты ұнады. Біз жаңа таныстар тауып, тәжірибе алмастық, заң, құқық, нашақорлықпен және лудоманиямен күрес сияқты қоғамдағы өзекті мәселелерді талқыладық. Ойын арқылы өмірде кездесетін кейбір жағдайларды бастан өткердік, бұл білімімізді нығайтуға көмектесті», – деді қатысушы және «Астана жастары» еріктісі Алимa.
Іс-шара соңында үздік командалар мен белсенді қатысушыларға естелік сыйлықтар табыс етілді.
«Біздің мақсатымыз – жастарға заң, құқық және жеке жауапкершілік туралы көбірек түсінік беру. Логикалық ойындар мен командалық тапсырмалар арқылы қатысушылар маңызды тақырыптар жөнінде білімдерін кеңейтіп, оны тәжірибеде қолдана алады. Бұл заң мен тәртіптің күнделікті өмірдегі маңызын түсінуге және жастардың құқықтық сауаттылығын арттыруға мүмкіндік береді», – деді «Астана жастары» жастар ресурстық орталығының маманы Алуа Балтабаева.
«Құқық қаласы» жобасы елордалық жастардың құқықтық сауаттылығын арттыруға және заң нормаларына саналы көзқарас қалыптастыруға бағытталған тиімді алаңға айналды.