Астана қаласындағы жұмыс берушілердің шетелдік жұмыс күшін тартуы

Шетелдік жұмыс күшін тарту Қазақстан Республикасы Еңбек және халықты әлеуметтік қорғау министрлігі белгілейтін квота шеңберінде, Қазақстан Республикасының ішкі еңбек нарығын қорғау қажеттілігін ескере отырып жүзеге асырылады.

Қазақстан Республикасы Премьер-Министрінің орынбасары - Еңбек және халықты әлеуметтік қорғау министрінің 2023 жылғы 30 маусымдағы № 279 бұйрығымен бекітілген жұмыс берушілерге шетелдік жұмыс күшін тартуға рұқсат беру немесе ұзарту, сондай-ақ корпоративішілік ауыстыруды жүзеге асыру қағидалары мен шарттарына сәйкес жұмыс берушінің шетелдік жұмыс күшін тартуы үшін келесі құжаттар қажет:

1. жұмыс берушінің ЭЦҚ-мен куәландырылған өтініші;
2. тартылатын шетелдік қызметкерлер туралы мәліметтер;
3. «Білім туралы» Қазақстан Республикасы Заңының 39-бабының 7-тармағына сәйкес күшіне енген Қазақстан Республикасының халықаралық шарттарында көзделген жағдайларды қоспағанда, Қазақстан Республикасының заңнамасында белгіленген тәртіппен заңдастырылған білім туралы нотариат куәландырған құжаттардың және аудармалардың (егер құжат мемлекеттік немесе орыс тілінде толтырылмаған болса) электрондық көшірмелері;
4. шетелдік қызметкердің біліктілігі мен кәсіби тәжірибесінің оны тарту жүзеге асырылатын лауазымға сәйкестігін растайтын жұмыс беруші хатының электрондық көшірмесі;
5. орындау мерзімі өткен алдыңғы және ағымдағы күнтізбелік жылдар үшін шетелдік жұмыс күшін тартуға рұқсат беру кезінде жүктелген міндеттемелердің орындалуы туралы ақпарат(олар болған кезде) (5-қосымша);
6. осы Қағидалардың 6 қосымшасына сәйкес нысан бойынша кадрлардағы жергілікті қамту туралы ақпарат;
7. шетелдік қызметкердің жеке басын куәландыратын құжаттың электрондық көшірмесі.

Ішкі еңбек нарығында тиісті кандидаттарды іздеу жұмыс беруші тарапынан Қазақстан Республикасының Әлеуметтік кодексінің 103-бабы 2-тармағының 1) тармақшасына сәйкес электрондық еңбек биржасына (www.enbek.kz) бос жұмыс орындары туралы мәліметтерді жіберу арқылы жүзеге асырылады.

Жұмыс беруші электрондық еңбек биржасына бос жұмыс орындары туралы мәліметтерді берген күннен бастап 15 (он бес) күнтізбелік күн өткен соң, орналастырылған бос жұмыс орнының жарияланым кодын көрсете отырып, шетелдік жұмыс күшін тартуға рұқсат беру туралы өтініш жолдайды.

Сондай-ақ, «Әкімшілік өндірістердің бірыңғай тізілімі», «Көші-қон полициясы», «ОТиБ» ақпараттық жүйелері, сондай-ақ «ИРС» ААЖ және «ЕСУТД» ИАЖ жүйелерінде тіркелген бұзушылықтарды жою қажет.

Өтініш сайтта беріледі https://elicense.kz/?lang=ru .

Мемлекеттік қызмет көрсету мерзімі – 19 жұмыс күні.