Чернобыль трагедиясының құрбандарына: Астанада ескерткішке гүл шоқтарын қою рәсімі өтті

Астанада Чернобыль апаты құрбандарының ескерткішіне гүл шоқтарын қою рәсімі өтті, деп хабарлайды елорда әкімдігінің ресми сайты.

Чернобыль атом электр станциясындағы апат құрбандарын еске алу рәсімі бір минут үнсіздіктен басталды. Іс-шараға апатты жоюшылар, "Чернобыль Одағы" қоғамдық бірлестігінің өкілдері, мәслихат депутаттары мен қала тұрғындары қатысты.

"Бүгін біз Чернобыльдағы трагедия құрбандарын еске алуға жиналдық. Біздің көптеген азаматтарымыз трагедияны жоюға қатысты. Бүгінгі таңда елордада төрт жүзден астам апат ардагері тұрады. Олар елорданың қоғамдық іс-шараларына белсенді қатысады және бізбен тығыз байланыста. Бүгін біз бұл адамдарға құрмет көрсетуден жалықпаймыз, өйткені біз олардың ерліктерін мәңгі есте сақтаймыз", – деді Астана қаласы Ішкі саясат басқармасының басшысы Нұрдәулет Әлмұханов.

Өз кезегінде қоғам қайраткері Ержан Айтықов қазақстандықтардың алғашқылардың бірі болып көмекке келгенін, көбісі өз еркімен апатты жоюшылар қатарына кіргенін атап өтті.

"Чернобыль апаты тарихтағы қорқынышты ядролық апаттардың бірі болып саналады. Халық көптеген ерлік жасады – құтқарушылар, еріктілер қараусыз қалған үйлерді тонаудан қорғады, көмек көрсетті. Сол мазасыз күндерде көптеген қазақстандықтар жанқиярлық, адамгершілік көрсетті. Қазір біздің халқымыз су тасқынынан зардап шеккендерге көмек жинап жатыр, сол кезде де апатты жоюға қатысқан", – деп бөлісті Ержан Айтықов.