АСТАНА БЮДЖЕТТІК ӨЗІН-ӨЗІ ҚАМТАМАСЫЗ ЕТУДІҢ ЖАҢА ДЕҢГЕЙІНЕ ШЫҒУДА

Мәслихат депутаттары 2026–2028 жылдарға арналған  Астана қаласының бюджетін мақұлдады. Елорда шығындарын жоспарлаудың негізгі тәсілдері мен параметрлері туралы Экономика және бюджеттік жоспарлау басқармасының басшысы Түгелбаева Айжан Алимқызы баяндады.

Экономиканың белсенді дамуы алдағы үш жылдық кезеңде Астана қаласының жергілікті бюджетіне 3,7 трлн теңге көлемінде кіріс түсуін қамтамасыз етеді. Осы қаражат аясында шамамен 44%, яғни жыл сайын 420 млрд теңгеден астамы әлеуметтік мақсаттарға бағытталады. Оның ішінде: білім беруге – 314,9 млрд теңге, денсаулық сақтауға – 16,5 млрд теңге, әлеуметтік қорғауға – 49,4 млрд теңге, мәдениет пен спортқа – 34,1 млрд теңге, ішкі, жастар және идеологиялық саясатқа – 7,8 млрд теңге қарастырылған.

2026 жылдан бастап елорда бюджеттік өзін-өзі қамтамасыз етудің жаңа деңгейіне шығады, яғни алғаш рет жоспарланған алымдар көлемі бөлінетін трансферттер сомасынан асып түсті.

Айжан Түгелбаева атап өткендей: «бізге 787 млрд теңге көлемінде алымдар төлеу қажет, бұл 2014–2025 жылдарды қоса алғанда соңғы 10 жылдағы барлық төлемдердің жалпы көлемінен шамамен екі есе көп».

Сонымен қатар елорда әкімдігі маңызды инфрақұрылымдық жобалардың құрылысын жалғастыру үшін 100 млрд теңгеден астам қаражат тапты, ал нақты секторды қаржыландыруға жұмсалатын жалпы шығындар 310 млрд теңгеден асады. Қаражаттың ең ірі көлемі мына салаларға бағытталады: көлік саласына – 146,6 млрд теңге, құрылысқа – 61,8 млрд теңге, энергетикаға – 22,8 млрд теңге, коммуналдық шаруашылыққа – 21,2 млрд теңге.

Шағын және орта бизнесті қолдауға, туризмді және инновацияларды дамытуға 10 млрд теңге қарастырылды.

2026–2028 жылдарға арналған елорда бюджеті міндеттемелердің қажетті теңгерімін қамтамасыз етеді, сондай-ақ 2030 жылға дейін Астананың дамыту жоспарының негізгі басымдықтарын қаржыландыруды көздейді.