ЖАҢА КОНСТИТУЦИЯ ЖОБАСЫ PRESIGHT AI ҚЫЗМЕТКЕРЛЕРІМЕН ТАЛҚЫЛАНДЫ

Presight AI қызметкерлері үшін АХҚО алаңында Қазақстан Республикасы жаңа Конституциясы жобасына арналған ақпараттық-түсіндіру семинары өтті.

Кездесу компания қызметкерлері мен қалалық коалиция өкілдерін конституциялық реформа аясында ұсынылып отырған негізгі өзгерістерді мазмұнды талқылау үшін біріктірді. Семинар спикерлері ретінде қалалық коалиция мүшелері, соның ішінде Астана қаласы Есіл аудандық ардагерлер кеңесінің төрайымы Шарипа Устемирова және BELES құрылыс компаниясы бас директорының орынбасары Ербол Сихимбаев сөз сөйледі.

Семинар барысында қатысушылар жаңа Конституция жобасының негізгі ережелерін, олардың елдің одан әрі дамуы үшін маңызын, сондай-ақ стратегиялық мәні бар шешімдерді талқылаудағы қоғамдық қатысудың рөлін қарастырды. Сонымен қатар, ашық диалогтың, саналы азаматтық қатысудың және ұсынылып отырған өзгерістердің мәнін терең түсінудің маңыздылығына ерекше назар аударылды.

Қатысушылар өздерін толғандырған сұрақтарын қойып, өзекті тақырыптар бойынша пікір алмасты. Еске салайық, 15 наурызда жалпыұлттық референдум өтеді, оның аясында әрбір азамат өз таңдауын білдіріп, дауыс бере алады.