В АСТАНЕ НАЧАЛ РАБОТУ СОВЕТ ПО РАЗВИТИЮ ИСКУССТВЕННОГО ИНТЕЛЛЕКТА
Елордада Жасанды интеллектіні дамыту жөніндегі кеңестің (AI-кеңес) алғашқы отырысы өтті. Жаңа консультативтік орган мемлекеттік органдардың, бизнестің, ғылымның және сараптамалық қауымдастықтың күш-жігерін біріктіріп, жасанды интеллект технологияларын қалалық басқару жүйесіне енгізу және цифрлық экономиканы дамыту үшін алаңға айналады.
Отырыс барысында қатысушылар Астананың цифрлық трансформациясының негізгі сын-қатерлерін талқылап, алғашқы бастамаларды айқындады. Негізгі назар инфрақұрылымды дамытуға, қалалық сервистердің сапасын арттыру үшін жасанды интеллектті қолдануға, тұрғындармен кері байланысты жетілдіруге және инновациялық жобаларды қолдауға аударылды.
Кеңес Астана қаласы әкімдігінің жанынан құрылды. Оның құрамына мемлекеттік органдардың, квазимемлекеттік сектордың, жоғары оқу орындарының, зерттеу орталықтарының, IT-компаниялардың және қоғамдық ұйымдардың өкілдері енді. Мұндай құрам әртүрлі пікірлердің кең ауқымын қамтамасыз етіп, кешенді шешімдер қабылдауға мүмкіндік береді.
Кеңестің жұмысы төрт бағыт бойынша ұйымдастырылды. «AI Government & Smart City» жұмыс тобы жасанды интеллектті мемлекеттік қызметтер мен цифрлық сервистерге енгізумен айналысады. «AI Infrastructure & Cybersecurity» бағыты деректерді өңдеу орталықтарын, бұлтты технологияларды дамытуға және киберқауіпсіздікке шоғырланады. «AI Ecosystem & Innovation» стартаптарды қолдау және инновацияларды ауқымдауға арналған алаң болады. Ал «AI Human Capital» бағыты мамандарды даярлауға және білім беру жүйесіне жасанды интеллект құзыреттерін енгізуге бағытталған.
«Жасанды интеллектіні дамыту жөніндегі Кеңестің құрылуы елорда үшін жаңа кезең ашады. Бұған дейін біз цифрлық инфрақұрылымды қалыптастыруға көңіл бөлсек, енді толыққанды жасанды интеллект экожүйесін құру міндеті тұр. Жасанды интеллект тұрғындардың игілігі үшін жұмыс істеуі тиіс – ол қалалық мәселелерді жедел шешуге, сервистерді ыңғайлы және басқаруды тиімді етуге көмектесуі қажет. Мемлекет, бизнес және ғылымның бірлескен күш-жігерімен біз Астананың болашақ технологияларын қолдануда өңірдің көшбасшысы болуы үшін жағдай жасаймыз», – деп атап өтті қала әкімінің орынбасары Евгений Глотов.
AI-кеңес бастамаларды іске қосу, үздік әлемдік тәжірибелерді енгізу және жасанды интеллект саласындағы жобаларды дамыту үшін тұрақты платформаға айналады. Оның қызметі технологияларды тұрғындардың игілігіне пайдаланып, елорданың халықаралық цифрлық аренадағы көшбасшылығын нығайтуға бағытталған.
Сондай-ақ, Кеңес өз жұмысына қатысуға және тәжірибесімен бөлісуге дайын жасанды интеллект саласының сарапшылары үшін ашық.