Бүкіләлемдік омыраумен емізу апталығы өтуде

1-7 тамыз аралығында әлемнің барлық елінде Бүкіләлемдік бала емізу апталығы өтуде. Оның мақсаты көпшілікке ана сүтінің бала ағзасы үшін пайдалы екендігін түсіндіру. Қазіргі уақытта Астана қаласының барлық Алғашқы медициналық-санитарлық көмек ұйымдары мен акушерлік блоктарында «Ашық есік» күндері өткізіліп жатыр.

         Баланы табиғи жолмен емізу – ана мен бала арасындағы эмоционалды байланысты нығайтады. Біз омыраумен емізуді қолдауға және ол кезеңді барынша ұзартуға шақырамыз. Өйткені «Дені сау бала - дені сау ұлт».

         Осыған орай, жас аналарға пайдасы тиер деген ниетпен, баланы дұрыс емізуге қатысты бірнеше пайдалы кеңестер әзірледік. Оқи отырыңыздар.

Баланы дұрыс емізудің артықшылықтары:

-        Тамақтандыру қауіпсіздігінің кепілі, баланы инфекциялардан қорғау

-        Баланың өсуі мен жетілуіне пайдасы (физикалық және интеллектуалды дамуына)

-        Тамақтандыруға қаржылық шығындардың болмауы

Дұрыс емізудің негізгі қағидалары

1. Баланы туылғаннан кейінгі алғашқы сағат ішінде кеудеге басу;
2. Балаға омырауды дұрыс беру (төмендегі техниканы қараңыз).
3. Бала омырау сұрағанда емізу, оның ішінде түнгі уақытта емізу.
4. Бір омырауды еміп болғаннан кейін баланы екінші омырауға ауыстыру.
5. Балаға емізік (соска) бермеу және бөтелкеден тамақтандырмау.
6. 6 айға дейін тек ана сүтімен тамақтандыру (басқа сұйықтықтар бермеу).
7. Баланы өмірге келгеннен бастап 1,5-3 жасқа жеткенге дейін емізу.

ДҰРЫС ЕМІЗУДІҢ БАСТЫ ҚАҒИДАСЫ – ОМЫРАУДЫ ДҰРЫС БЕРУ – омырау ұшын баланың таңдайына тигізіп немесе баланың аузына тура емес, сәл жоғары қаратып емізу – дұрыс емізу болып саналады. Бұл жағдайда сүтбез ареоласының төменгі жағы көбірек баланың ауызына кіріп тұрады. Баланың аузын неғұрлым кең аштырған жөн (бұрыш 130-150 гр.), тілі қызыл иектің үстінде болуы керек, сонда ему кезінде анасы ауырсынуды сезінбейді.

МАҢЫЗДЫ: анасы  өзімен баласына ыңғайлы болатындай жағдай жасауы керек - баланың беті анасының денесіне бұрылып, басы, иығы мен жамбасы бір сызықта болғаны жөн.