Күзгі шақыруға дайындық: Астана қаласының әкімдігінде кеңес өтті

2025 жылғы 15 тамызда Астана қаласы әкімдігінде азаматтарды күзгі кезеңде міндетті әскери қызметке шақыруды дайындау және ұйымдастыру мәселелеріне арналған кеңес өтті. Іс-шараға Астана қаласы әкімінің орынбасары Ерік Серікұлы Мейірханов төрағалық етті.

Кеңес жұмысына Астана қаласының мемлекеттік органдар өкілдері: Жұмылдыру дайындығы, аумақтық және азаматтық қорғаныс басқармасы, аудан әкімдіктері, Қорғаныс істері жөніндегі департаменті, Полиция департаменті, Азаматтық қорғанысты қамтамасыз ету орталығы және әскери қауіпсіздік пен қорғаныс мәселелері бойынша әкімнің көмекшісі қатысты.

Негізгі талқыланған мәселе – ағымдағы жылғы күзгі шақыру науқанын ұйымдастыру болды. Қатысушылар күзгі шақыруды дайындау барысын қарап, шақыру комиссияларымен кездесетін өзекті мәселелерді анықтап, оларды шешу жолдарын белгіледі.

Мерзімді әскери қызметке қатысты заңнамалық өзгерістер туралы Қорғаныс істері департаментінің өкілдері баяндама жасады. Олар шақыру жүйесін реттейтін нормативтік-құқықтық актілерге енгізілетін өзгерістер туралы ақпарат берді.

Күн тәртібіндегі тағы бір маңызды мәселе – әскери қызметтен жалтарған азаматтарды іздеу жұмыстары болды. Полиция департаменті қазіргі таңдағы жағдай туралы мәлімет ұсынды.

Кеңестің қорытындысы бойынша шақыру науқанын тиімді өткізу, шақыруға жататын азаматтармен жұмысты күшейту және барлық мүдделі органдар арасындағы өзара іс-қимылды нығайту бағытында шешімдер қабылданды.