Жұмысшы мамандықтар жылы: қазақстандық жұмысшылар мен инженерлер заманауи бронетехниканы он жылдан бері жасап келеді

Елордада Жұмысшы мамандықтар жылында Астананың №1 индустриалды паркінің жетекші кәсіпорындарының бірі – Kazakhstan Paramount Engineering (KPE) компаниясына арналған арнайы тақырыптағы іс-шара өтті. Іс-шара Қазақстан Республикасы Қарулы Күштерінің Ұлттық әскери-патриоттық орталығында ұйымдастырылды.  

KPE кәсіпорны дөңгелекті бронетехниканы шығаратын өндірістік алаң ретінде құрылған. Бүгінде мұнда қорғаныс мақсатындағы техниканы жинау, техникалық қызмет көрсету және жаңғырту бойынша жұмыстар атқарылады. Негізгі өндірістік үдерістер инженерлер, технологтар, дәнекерлеушілер және өзге де жұмысшы мамандық иелерінің кәсіби еңбегіне сүйенеді.

Іс-шара барысында он жыл ішінде кәсіпорын тұрақты өндірістік процестерді қалыптастырып, күрделі техникалық үлгілермен жұмыс істей алатын мамандар даярлағаны атап өтілді. Жұмысшы мамандықтар жылында инженерлердің, дәнекерлеушілердің, құрастырушылардың және өндіріс саласындағы өзге де мамандардың еңбегіне ерекше назар аударылды.

Қонақтарға кәсіпорын шығаратын техника үлгілері, түрлі модификациядағы бронемашиналар және қару-жарақ элементтері көрсетілді. Сондай-ақ қазіргі әскери бөлімшелерде қолданылатын әзірлемелер таныстырылды.

Кәсіпорынның он жылдық мерейтойы өндіріс саласында еңбек етіп жүрген мамандардың үлесін атап өтуге және он жылдық жұмыстың нәтижелерін қорытындылауға мүмкіндік берді.