Медициналық туризмдегі жаңа турөнім: Астананы жаңа қырынан таны
Елордада туроператорларға арналған, медициналық туризмді дамытуға бағытталған маңызды ақпараттық тур өтті. Шараны «Astana Tourism» туризмді дамыту орталығы» ЖШС офтальмологиялық «Astana Vision» клиникасымен бірлесе ұйымдастырды.
Іс-шара барысында Астананың медициналық және туристік әлеуетін біріктіретін жаңа туристік өнімнің тұсауы кесілді. Негізгі назар офтальмология саласындағы медициналық турларды дамытуға және шетелдік пациенттерге бағытталған клиникалар мен туроператорлар арасындағы ынтымақтастықты кеңейтуге аударылды.
Медицина мен туризм — бір толқында
Ақпараттық турға қатысушылар заманауи Astana Vision клиникасына барып, көру қабілетін лазерлік түзету, көз ауруларын диагностикалау және хирургиялық емдеу саласындағы алдыңғы қатарлы технологиялармен танысты.
Клиниканың басты артықшылығы — шетелдік пациенттердің талаптарына сай қызмет көрсетуге және туроператорлармен агенттік әріптестік негізінде жұмыс істеуге толық дайын екендігі.
Агенттік келісімдерге қол қою
Іс-шара барысында Astana Vision клиникасы шетелдік пациенттерді қабылдауға маманданған туроператорлар мен медициналық агенттермен агенттік ынтымақтастық бағдарламасын іске қосатынын хабарлады. Сол күні бес туроператормен ресми келісімшарттарға қол қойылды.
Бұл қадам елордадағы медициналық қызметтерді халықаралық деңгейде бірлесе ілгерілетуге жаңа мүмкіндіктер ашады.
Қызмет тек пациенттерге емес, туристерге де қолжетімді
Жаңа турөнімнің бірегей ерекшелігі — клиника қызметтері тек ем қабылдауға келгендерге ғана емес, Астанаға сапарлап келген туристерге де қолжетімді.
Заманауи жабдықтар мен жоғары сапалы қызмет көрсету жүйесінің арқасында көру қабілетін лазерлік түзету сияқты процедураларды жылдам, қауіпсіз және ұзақ күтусіз өтуге мүмкіндік бар.
Осылайша, іскерлік немесе танымдық мақсатта елордаға келген турист өз демалысын денсаулық күтімімен ұштастыра алады: көру қабілетін қалпына келтіру, диагностикадан өту немесе профилактикалық тексеруден өту мүмкіндігі қарастырылған.
«Біз Астана қонақтары қаланы жаңа көзқараспен — сөздің тура да ауыспалы мағынасында — көрсін дейміз. Бұл біздің “Астананы жаңа қырынан таны” тұжырымдамасының өзегі», — деп атап өтті ұйымдастырушылар.
Astana Tourism бастамасы елорданы тек Орталық Азияда ғана емес, сонымен қатар халықаралық деңгейде медициналық туризмнің танымал орталығына айналдыруды мақсат етеді.
Жақын уақытта жаңа турөнімді маркетингтік тұрғыдан ілгерілету, агенттіктермен серіктестік бағдарламаларды дамыту және медициналық қызметтерді стандартты туристік пакеттерге енгізу жоспарланып отыр.
«Астана бүгінде тек әсер алатын қала ғана емес, сонымен қатар өмір сапасын арттыруға мүмкіндік беретін орталық. Бұл біздің қаланы жайлы өмірді, денсаулық пен инновацияны бағалайтын заманауи турист үшін одан сайын тартымды етеді», — деді Astana Tourism өкілдері.
Толығырақ: @elorda.info