Астанада «Қазақстан денсаулық сақтау саласы: инновациялар, қолжетімділік, жаһандану» халықаралық конференциясы өтуде

Астанада «Қазақстан денсаулық сақтау саласы: инновациялар, қолжетімділік, жаһандану» халықаралық конференциясы өтуде

13–14 қазан күндері Астанада денсаулық сақтау саласындағы маңызды іс-шара – «Қазақстан денсаулық сақтау саласы: инновациялар, қолжетімділік, жаһандану» халықаралық конференциясы және көрмесі өтіп жатыр.

Конференцияда еліміздің дәрілік саясат пен медициналық туризмді дамыту бағыттарындағы өзекті мәселелер мен перспективалар талқылануда.

Бүгін қатысушылар «Қазақстан Республикасындағы медициналық туризмді дамыту: перспективалар мен мүмкіндіктер» тақырыбында пікір алмасты.

Ертең конференцияда «Қазақстан денсаулық сақтау саласы: дәрілік заттар және инновациялық технологиялар» тақырыбы талқыланбақ.

Іс-шара аясында Astana Tourism туризмді дамыту орталығы мен ҚР Денсаулық сақтау министрлігінің С. Қайырбекова атындағы денсаулық сақтауды дамыту ұлттық ғылыми орталығы өзара ынтымақтастық туралы меморандумға қол қойды.

Меморандумның мақсаты – медициналық туризм саласындағы ведомствоаралық ынтымақтастықты дамыту және Қазақстанның Орталық Азиядағы жетекші медициналық орталық ретіндегі позициясын нығайту.

Құжатта шетелдік пациенттерге арналған медициналық қызметтердің сапа стандарттарын және нормативтік-құқықтық базасын әзірлеу, сондай-ақ Қазақстанды халықаралық алаңдарда медициналық туризмнің тартымды бағыты ретінде ілгерілету және бірлескен іс-шараларды жүзеге асыру бойынша жұмыс тобын құру қарастырылған.

«Медициналық туризм – болашағы зор бағыттардың бірі.

Бүгінде Қазақстан JCI (Joint Commission International) аккредитациясынан өткен ұйымдар саны бойынша әлемде 25-орында, оның 7-і Астанада орналасқан.

2024 жылы шетелден келген шамамен 4,5 мың пациент астаналық клиникаларда халықаралық стандарттарға сай жоғары білікті медициналық көмек алды.

Ең көп сұранысқа ие бағыттар – онкология, кардиохирургия, репродуктивті медицина және чекап бағдарламалары,» – деді Артём Квашук.

Конференцияға 200-ден астам қатысушы, соның ішінде мемлекеттік органдардың өкілдері, медициналық ұйымдар, жеке сектор, ғылыми қауымдастық және халықаралық сарапшылар қатысуда.

 

https://www.instagram.com/p/DPwEwqpCL4R/?hl=ru