Қалалық базарларды жаңғырту мәселелері бойынша жұмыс кездесуі өтті

11 қыркүйекте елордада қалалық базарларды жаңғырту мәселелері бойынша жұмыс кездесуі өтті. Сауда базарларын жаңғырту жөніндегі Жол картасына сәйкес, Астанада жеті нысан жаңғыртудан өтеді. Олар: «Ұлжан», «Алтай», «Шанхай (Көк Базар)», «Сарыарқа», «Орталық базар», «Алаш» және «Шарын» базарлары.

Іс-шараны Астана қаласының Инвестициялар және кәсіпкерлікті дамыту басқармасы мен Астана қаласы бойынша Сауда және тұтынушылардың құқықтарын қорғау департаменті ұйымдастырды. Жиынға Төтенше жағдайлар департаментінің, Санитариялық-эпидемиологиялық бақылау департаментінің өкілдері мен базар кәсіпкерлері қатысты.

Кездесу барысында қатысушыларға жаңғырту талаптары бойынша түсіндіру жұмыстары жүргізілді. Атап айтқанда: автотұрақ аймақтарын ұйымдастыру, санитариялық нормаларды сақтау, өрт қауіпсіздігін қамтамасыз ету, сондай-ақ онлайн төлем мен цифрлық шешімдерді енгізу мәселелері талқыланды.

Бүгінде еліміз бойынша базарларды ауқымды жаңғырту жұмыстары жүргізілуде. Заңнамаға сәйкес, барлық сауда базарларын жаңғыртудың бірыңғай мерзімі – 2025 жылдың 31 желтоқсанына дейін белгіленген.