Орталық саябақта ORTA әріптері орнатылады
Астана ең ауқымды экологиялық фестиваль — ORTA FEST-ке дайындалуда. Фестиваль 31 тамыз күні Орталық саябақта өтіп, 30-дан астам қалалық қауымдастықты біріктіреді. Ұйымдастырушылар бұл шараны барша отбасыға арналған үлкен мереке ретінде сипаттап отыр — онда ондаған белсенділік, арт-нысандар және музыкалық бағдарлама ұсынылады. Кіру тегін.
Экологиялық қаланың символы
29 тамыз күні «Қалалық сағат» маңында биіктігі 2 метрден асатын ORTA әріптері орнатылады. Барлық қала тұрғындары мен қонақтары бұл әріптердің ішін пластикалық бөтелкелер мен текстиль өнімдерімен толтыра алады.
«Міндет – әріптерді ернеуіне дейін толтырып, пайдаланылған шикізаттың да құнды ресурс бола алатындығын көрсету. Бұл біздің қаламыздың болашағы туралы хабардар ету және қамқорлыққа баулу», — дейді ұйымдастырушылар.
Бұған дейін FUNK.agency командасы елордалық суретшілер мен экоактивистермен бірлесіп, пайдаланылған материалдардан Мысық мүсінін жасаған болатын.
Аталған арт-нысан орталық саябақтың көрнекті нысанына айналып, экологиялық ойлаудың символы ретінде танылды.
Арт және экология
Фестиваль продюсері Майра Измайлованың айтуынша, биыл ORTA FEST аясында эко-арт аллеясы ашылады.
Ұйымдастырушылар суретшілер арасында «EcoHuman: болашақтың астаналық тұрғыны» атты байқау өткізіп, пайдаланылған шикізаттан жасалатын инсталляциялар жасау үшін 9 жеңімпазға әрқайсысына 150 000 теңгеден қаржылай қолдау көрсетті.
Қаланың тұрғындары да сырт қалмайды: 31 тамыз күні пайдаланылған шикізаттан жасалған киімдер шеруі — Eco-Con өтеді.
Әркім қатыса алады, ал ең креативті образдардың авторларына фестиваль серіктестерінен естелік сыйлықтар табысталады.
Бұған дейін FUNK.agency командасы Елорданың суретшілерімен және экоактивистерімен бірге пайдаланылған шикізаттан Мысық жасаған болатын. Өнер нысаны жасыл ойлаудың символына және Орталық саябақтағы тартымдылық орталығына айналды.
ORTA FEST фестивалінің 10 аймағы
Фестиваль 10 тақырыптық аймаққа бөлінген. Әр аймақ саналы қаланың құндылықтарын көрсетеді:
Orta eco village — дəрмарка, экотренер Мариям Касымова мен Harahura командасының қатысуымен саналы тұтыну бойынша мастер-класстар. Стилист Ажар Имашева second-hand киімдерден стильді образ жасауға көмектеседі
Эко-шеберлер мен дизайнерлердің ашық жәрмеңкесі
Orta kids & future — отбасылық белсенділіктер мен балаларға арналған шеберлік сағаттары
Арт-аймақ — инсталляциялар көрмесі, кітаптардың тұсаукесері, поэзиялық микрофон, театрлық перформанстар және фристайлшылардың өнер көрсетуі
Public Talk — сарапшылармен пікірталас алаңы
СӨС-аймақ — йога, жүгіру, бокс, cycle, волейбол, баскетбол, айкуне және басқа да спорт түрлері бойынша жаттығулар
Balance — трансформациялық ойындар мен тәжірибелер
Animal care — жануарларды қорғау тақырыбындағы дәрістер, «Солтүстік Қазақстан құстары» атты фотокөрме
Инклюзия — қолжетімді орта туралы пікірталастар мен белсенділіктер
Бизнес-аймақ — экология мен тұрақты даму саласындағы жобалар
Баршаға арналған мереке
Қонақтарды музыканттардың өнер көрсетуі, би бойынша шеберлік сабақтар, әлеуметтік билер, спортшылар мен роллерлердің көрсетілімдері, дəрмарка және көптеген интерактивтер күтеді.
Күтілетін қатысушылар саны — 10 000-нан астам адам.
Фестивальдің мақсаты
Қоршаған ортаға ұқыпты қарау әдетін қалыптастырып, экологиялық ойлауды дамыту.
«Біз экология — бұл заманауи, әсем әрі қызықты екенін көрсеткіміз келеді. ORTA FEST саналы Астананың жыл сайынғы символына айналады», — деп атап өтті Майра Измайлова.
Бас серіктес — «Zero Waste» ЖШС, қатты тұрмыстық қалдықтарды шығару саласындағы компания.
Іс-шара «Таза Қазақстан» акциясы аясында Астана қаласы әкімдігінің қолдауымен өткізіледі.