26-28 тамыз күндері Елордамызға келген ҚХР делегациясына ақпараттық тур ұйымдастырылды

«Қазақстандағы Қытай туризмі жылы» аясында 26-28 тамыз күндері Елордамызға келген ҚХР делегациясына ақпараттық тур ұйымдастырылды. Оның құрамында дәрігерлер, сарапшылар және «Чуньчуань» Пекин мәдени-медиа компаниясының және «Ctrip», «Shanghai Shenmao», «Shangshu International» атты туристік компанияларының өкілдері болды.

Бұл сапардың мақсаты – екі елдің денсаулық сақтау саласындағы ынтымақтастығын нығайту және медициналық туризмді кеңейту. Сондай-ақ қазақстандық медицинаның мүмкіндіктерін көрсетіп, тәжірибе алмасу және серіктестік байланыстар орнату.

Тур аясында меймандар сапа мен қауіпсіздіктің жетекші әлемдік стандартына сай JCI (Joint Commission International) сертификатталған Астананың 7 клиникасына барды. Олардың қатарында – репродуктивті медицина және ЭКО орталықтары, пластикалық хирургия және премиум-кластағы стоматологиялық клиникалар, балаларды оңалту орталықтары бар.

Медициналық мекемелердің мәліметтеріне сәйкес, өткен жылы Астанада 4 500-ге жуық шетелдік пациент тіркелген, бұл қаланың медициналық қызметтеріне деген қызығушылықтың артып келе жатқанын көрсетеді. Кардиохирургия, нейрохирургия, онкология, стоматология, репродуктивті медицина және ЭКО-ға сұраныс жоғары көрінеді.

Ақпараттық тур халықаралық ынтымақтастықты дамытуда маңызды қадам болмақ және Қазақстанның Орталық Азиядағы жоғары технологиялық және қолжетімді медициналық туризм орталығы ретіндегі позициясын нығайтады.