«Заң мен тәртіп»: спортшылармен ашық кездесу өтті

Бүгін елордадағы «TANYM» көпфункционалды кешенінде Астана қаласының Дене шынықтыру және спорт басқармасының ұйымдастыруымен «Заң мен тәртіп» қағидаты аясында мотивациялық кездесу өтті. Ашық диалог форматында өткен іс-шараға 150-ден астам жас спортшы қатысты.

Кездесудің құрметті қонағы — NAIZA лигасының әлем чемпионы, панкратионнан әлем чемпионы, ММА бойынша кәсіби рекорды 5–0 болатын Ильдар Құдайбергенов болды.

Спортшы өз өмір жолымен бөлісіп, табандылық пен жігердің адамды биік белестерге жетелейтінін атап өтті. Оның айтуынша, өміріндегі күрделі кезеңдерге қарамастан, ол спортқа қайта оралып, қысқа уақыт ішінде әлемдік деңгейдегі жетістіктерге қол жеткізген. Бүгінде Ильдар Құдайбергенов қиын жағдайға тап болған жастармен белсенді жұмыс жүргізіп, оларға бағыт-бағдар беріп келеді.

– Өмірде түрлі сынақтар болады. Сол сәттерде адамға қолдау мен дұрыс бағыт аса маңызды. Менің де қайтадан өз жолымды табуыма жақындарымның көмегі көп тиді. Спортқа оралып, бар күшімді салдым. Қазір жастармен кездесіп, өз тәжірибеммен бөлісіп жүрмін. Әр адам өзіне сеніп, еңбектенсе, міндетті түрде нәтижеге жете алады, – деді спортшы.

Іс-шараға сондай-ақ «Темір адам» лақап атымен танылған спортшы, армрестлингтен Азия чемпионы, мас-рестлингтен әлем чемпионатының жүлдегері, «Намыс» марапатының иегері Тимур Спатаев қатысты. Ол жастарға тәртіп пен жүйеліліктің жетістікке жетудегі маңызы туралы айтты.

Кездесу барысында Астана қаласы прокуратурасының өкілдері мен ювеналды полиция қызметкерлері де сөз сөйлеп, жасөспірімдер арасындағы құқықбұзушылықтың алдын алу мәселелеріне тоқталды. Астана қаласы прокуратурасының басқарма прокуроры Ақжол Сәтілда жасөспірімдер арасында жиі кездесетін құқықбұзушылық түрлерін атап өтті.

– Көбіне тіркелетін оқиғалар – жасөспірімдердің кешкі уақытта үйде болмауы, бұл 442-бапта қарастырылған. Одан бөлек кейбір балалардың өтпелі кезеңде тәртіп, тәрбиесі төмендеп, ата-ана тарапынан түсініспеушілік көп туындайды. Сондай жаста жасөспірімдер үйден қашып, басқа түрлі ортаға тап болады. Осы ретте біз тек балалармен ғана емес, олардың ата-аналарымен де жұмыс жүргіземіз, – деді ол.

Іс-шараның негізгі мақсаты – жастар арасында заңға құрмет, жауапкершілік және салауатты өмір салтын қалыптастыру, сондай-ақ спорт арқылы тұлғалық дамуға ықпал ету.

Ашық диалог форматындағы кездесуде жасөспірім спортшылар өз ойларын еркін жеткізіп, тәжірибелі спортшылармен тікелей пікір алмасып, сұрақтар қойды. Сондай-ақ олар өмірлік қиындықтарды еңсеру мен жеке даму жолдары бойынша пайдалы кеңестер алды.